गरीबांच्या ताटातील घास लुटण्याचा प्रयत्न? बुलढाण्यात 41 क्विंटल सरकारी रेशनचा तांदूळ जप्त; पोलिसांची मोठी कारवाई

गरीब आणि गरजू नागरिकांसाठी सार्वजनिक वितरण प्रणालीद्वारे (रेशन) वितरित करण्यात येणारा तांदूळ अवैधरित्या वाहतूक केला जात असल्याचा संशय व्यक्त होत असताना बुलढाणा जिल्ह्यात धाड पोलिसांनी मोठी कारवाई केली आहे. गोपनीय माहितीच्या आधारे पोलिसांनी छापा टाकून तब्बल 41 क्विंटल 63 किलो सरकारी रेशनचा तांदूळ आणि तो वाहून नेण्यासाठी वापरण्यात आलेले आयशर वाहन जप्त केले. या कारवाईमुळे परिसरात मोठी खळबळ उडाली असून सार्वजनिक वितरण व्यवस्थेतील गैरप्रकारांबाबत पुन्हा एकदा चर्चा सुरू झाली आहे.

धाड पोलीस स्टेशनच्या हद्दीतील वॉर्ड क्रमांक 5, नसीब नगर परिसरात सरकारी रेशनच्या तांदळाची अवैध वाहतूक होत असल्याची गोपनीय माहिती पोलिसांना मिळाली होती. त्यानुसार प्रभारी अधिकारी सहाय्यक पोलीस निरीक्षक अजिनाथ मोरे यांच्या मार्गदर्शनाखाली हेड कॉन्स्टेबल रविंद्र चव्हाण, हेड कॉन्स्टेबल श्रीकृष्णा चव्हाण आणि पोलीस कॉन्स्टेबल भगवान खमाटे यांनी शासकीय वाहनातून घटनास्थळी जाऊन संशयित वाहनाची तपासणी केली.

तपासणीदरम्यान आयशर कंपनीचे विक्टरी रंगाचे MH-04-BG-6022 क्रमांकाचे वाहन अडविण्यात आले. वाहनाची झडती घेतली असता त्यामध्ये एकूण 84 पोत्यांमध्ये 4,163 किलो म्हणजेच 41 क्विंटल 63 किलो सरकारी रेशनचा तांदूळ आढळून आला. पोलिसांनी तातडीने पंचनामा करून संपूर्ण तांदूळ आणि वाहन ताब्यात घेतले.

जप्त करण्यात आलेल्या तांदळाची अंदाजे किंमत 41 हजार 600 रुपये असून वाहनाची अंदाजे किंमत 3 लाख रुपये आहे. अशा प्रकारे एकूण 3 लाख 41 हजार 600 रुपयांचा मुद्देमाल पोलिसांनी जप्त केला आहे. ही कारवाई सार्वजनिक वितरण प्रणालीतील धान्याच्या अवैध वाहतुकीविरोधातील महत्त्वाची कारवाई मानली जात आहे.

प्राथमिक चौकशीत हे वाहन सलीम खान युसुफ खान (वय 42, रा. वॉर्ड क्र. 5, नसीब नगर, धाड) यांच्या मालकीचे असल्याचे निष्पन्न झाले. जप्त करण्यात आलेला तांदूळ सार्वजनिक वितरण प्रणालीतील असल्याचा संशय व्यक्त करण्यात आला असून संपूर्ण मुद्देमाल पुढील तपासासाठी धाड पोलीस स्टेशनमध्ये जमा करण्यात आला.

या प्रकरणात आवश्यक कायदेशीर कार्यवाहीसाठी बुलढाणा तहसीलदार कार्यालयाशी पत्रव्यवहार करण्यात आला होता. तहसीलदारांच्या अहवालानंतर अत्यावश्यक वस्तू अधिनियम, 1955 मधील कलम 3 आणि 7 अन्वये धाड पोलीस स्टेशनमध्ये गुन्हा दाखल करण्यात आला असून या प्रकरणाचा अधिक तपास सुरू आहे. या प्रकरणामागे आणखी कोणाचा सहभाग आहे का, तसेच सरकारी रेशनचा तांदूळ नेमका कुठे नेला जात होता, याचा शोध पोलीस घेत आहेत.