चारित्र्याच्या संशयातून संसाराचा शेवट? दोन दिवसांपूर्वी दिले होते भांडण न करण्याचे आश्वासन; किनगाव राजात २३ वर्षीय विवाहितेचा मृत्यू, पती अटकेत

किनगाव राजा, बुलढाणा : समाधान सरकटे 

पती-पत्नीमधील वाद आणि चारित्र्याविषयीच्या संशयातून एका विवाहितेचा मृत्यू झाल्याची घटना सिंदखेड राजा तालुक्यातील किनगाव राजा येथे उघडकीस आली आहे. संजीवनी विजय दाभाडे (वय २३) असे मृत विवाहितेचे नाव आहे. या प्रकरणी तिचा पती विजय संजय दाभाडे (वय ३१) याला पोलिसांनी अटक केली आहे. अवघ्या दोन दिवसांपूर्वी पतीने भांडण न करण्याचे आश्वासन दिले होते, अशी माहिती तक्रारीत नमूद करण्यात आली आहे. या घटनेमुळे परिसरात हळहळ व्यक्त होत आहे.

पोलिसांत दाखल फिर्यादीनुसार, विजय दाभाडे याला दारूचे व्यसन होते. पत्नी संजीवनी कोणाशी तरी फोनवर बोलत असल्याच्या संशयातून तो तिच्याशी वारंवार वाद घालून मारहाण करीत असल्याचा आरोप आहे. २० ऑक्टोबर रोजीही मारहाण झाल्यानंतर संजीवनीचे वडील सुधाकर वाघमारे हे कुटुंबीयांसह किनगाव राजा येथे आले होते.

त्यावेळी विजयने पुन्हा दारू पिणार नाही आणि पत्नीशी भांडण करणार नाही, असे आश्वासन दिल्याचे फिर्यादीत म्हटले आहे. मात्र, त्यानंतर अवघ्या दोन दिवसांतच संजीवनीच्या मृत्यूची बातमी समोर आली. त्यामुळे कुटुंबीयांवर दुःखाचा डोंगर कोसळला.

२२ ऑक्टोबर रोजी सकाळी घरमालकाचा फोन आल्यानंतर संजीवनीचे आई-वडील आणि भाऊ तिच्या घरी पोहोचले. त्यावेळी घराचा दरवाजा आतून बंद होता. विजयने दरवाजा उघडल्यानंतर संजीवनी पलंगावर चादर पांघरलेल्या अवस्थेत दिसली. चादर बाजूला केल्यानंतर तिच्या गळ्यावर दोरीचे वळ दिसल्याचे फिर्यादीत नमूद आहे. विचारणा केली असता विजयने गळा आवळल्याचे सांगितल्याचा उल्लेखही तक्रारीत करण्यात आला आहे.

संजीवनी आणि विजय यांचा विवाह २०२१ मध्ये झाला होता. त्यांना आदित्य आणि अंतरा अशी दोन लहान मुले आहेत. आईच्या मृत्यूमुळे या दोन्ही चिमुकल्यांच्या आयुष्यात मोठी पोकळी निर्माण झाली आहे. या घटनेने नातेवाईकांसह परिसरातील नागरिकांमध्ये हळहळ व्यक्त होत आहे.

या प्रकरणी किनगाव राजा पोलिसांनी गुन्हा क्रमांक ३७४/२०२६ अन्वये भारतीय न्याय संहिता कलम १०३(१) अंतर्गत खुनाचा गुन्हा दाखल केला आहे. पोलीस अधीक्षक निलेश तांबे, अपर पोलीस अधीक्षक अमोल गायकवाड आणि उपविभागीय पोलीस अधिकारी अर्जुन ठोसरे यांच्या मार्गदर्शनाखाली सहाय्यक पोलीस निरीक्षक संजय मातोंडकर यांच्या पथकाने आरोपीला अटक केली. प्रकरणाचा पुढील तपास पोलीस करीत आहेत.

कौटुंबिक वादातून घडलेल्या या घटनेने पुन्हा एकदा गंभीर प्रश्न उपस्थित केला आहे. मात्र, या प्रकरणातील आरोप आणि घटनेचा संपूर्ण तपशील तपासातून स्पष्ट होणार आहे.