बुलढाणा | प्रतिनिधी – विशाल गवई
कर्तव्यावर जाण्यासाठी घरातून निघालेल्या एसटी बसचालकाचा प्रवास कायमचा थांबला. बुलढाणा शहरातील जयस्तंभ चौकाजवळ भरधाव बोलेरोने दिलेल्या जोरदार धडकेत एसटी चालक रमेश सर्जेराव उबरहंडे यांचा जागीच दुर्दैवी मृत्यू झाला. या घटनेमुळे बुलढाणा आगारासह संपूर्ण परिसरात हळहळ व्यक्त होत आहे.
मूळचे पांग्री उबरहंडे येथील रहिवासी असलेले रमेश सर्जेराव उबरहंडे (वय ५६) हे महाराष्ट्र राज्य मार्ग परिवहन महामंडळाच्या बुलढाणा आगारात चालक म्हणून कार्यरत होते. सध्या ते बुलढाणा शहरातील सागवन परिसरातील धाड नाक्याजवळ राहत होते.
👉 विशेष जाहिरात | अधिक माहितीसाठी क्लिक करा
३ जुलै रोजी सकाळी सुमारे ११ वाजता ते एमएच-२८-बीडी-२३३४ क्रमांकाच्या स्कुटीवरून कर्तव्यावर हजर होण्यासाठी बुलढाणा आगाराकडे निघाले होते. त्यादिवशी त्यांची बुलढाणा-मेहकर या मार्गावरील बसवर चालक म्हणून ड्युटी होती.
जयस्तंभ चौकाजवळील हिरोळे पेट्रोल पंपासमोर भरधाव वेगाने आलेल्या एमएच-२८-बीबी-३४३० क्रमांकाच्या बोलेरोने त्यांच्या दुचाकीला जोरदार धडक दिली. या भीषण अपघातात ते बोलेरोच्या चाकाखाली आल्याने गंभीर जखमी झाले. नागरिकांनी मदतीसाठी धाव घेतली; मात्र रुग्णालयात नेण्यापूर्वीच डॉक्टरांनी त्यांना मृत घोषित केले.
घटनेनंतर बुलढाणा शहर पोलिसांनी तातडीने घटनास्थळी धाव घेत पंचनामा केला. मृत चालकाचे पुत्र अनिकेत रमेश उबरहंडे यांनी दिलेल्या तक्रारीवरून बोलेरो चालक अनिल बाळू बरडे (रा. जुना गाव, भीलवाडा) याच्याविरुद्ध गुन्हा दाखल करण्यात आला आहे. प्रभारी ठाणेदार गजानन कांबळे यांच्या मार्गदर्शनाखाली पोहेकॉ रणजित हिवाळे पुढील तपास करत आहेत.
रमेश उबरहंडे यांच्या पार्थिवावर जिल्हा सामान्य रुग्णालयात शवविच्छेदन झाल्यानंतर शहरातील त्रिशरण चौक स्मशानभूमीत शोकाकुल वातावरणात अंत्यसंस्कार करण्यात आले. त्यांच्या निधनामुळे बुलढाणा आगारातील चालक-वाहक, अधिकारी-कर्मचारी तसेच पांग्री गावातील नागरिकांमध्ये शोककळा पसरली आहे.
त्यांच्या पश्चात पत्नी, आई, एक मुलगा, मुलगी, जावई आणि मोठा आप्तपरिवार असा परिवार आहे.
वाचकांसाठी महत्वाचे
महाराष्ट्रातील ताज्या घडामोडी, जिल्हानिहाय ब्रेकिंग न्यूज, सरकारी योजना, भरती, शेती, शिक्षण आणि स्थानिक बातम्यांसाठी Kattanews.in ला नियमित भेट द्या. ही बातमी शेअर करून अधिकाधिक नागरिकांपर्यंत पोहोचवा.
Related News
