साखरखेर्डा |समाधान सरकटे
साखरखेर्डा परिसरातील पाझर तलाव आणि सिंचन तलावांमध्ये यंदा अल्प पावसामुळे अत्यल्प पाणीसाठा उपलब्ध असताना काही तलावांमधून अद्यापही मोठ्या प्रमाणात पाणी उपसा सुरू असल्याचा प्रकार समोर आला आहे. एकीकडे या पाण्यावर वन्यप्राण्यांची तहान भागविण्याची अपेक्षा व्यक्त होत असताना दुसरीकडे सुरू असलेल्या पाणी उपशामुळे तलावांमधील शिल्लक साठाही संपण्याची भीती निर्माण झाली आहे. त्यामुळे पाझर तलावांमधील पाणी वन्यजीवांसाठी राखीव ठेवून सुरू असलेला पाणी उपसा तातडीने बंद करावा, अशी मागणी नागरिकांकडून होत आहे.
साखरखेर्डा परिसरातील अनेक गावांमध्ये पाझर तलाव आणि सिंचन तलाव आहेत. या तलावांमध्ये परिसरातील पाळीव जनावरांसह वन्यप्राण्यांचीही तहान भागते. मात्र, यंदा अपेक्षित पाऊस न झाल्याने एकही पाझर तलाव किंवा सिंचन तलाव पूर्ण क्षमतेने भरलेला नाही. त्यामुळे उपलब्ध असलेला मर्यादित पाणीसाठा जपण्याची गरज निर्माण झाली आहे.
या परिसरात रोही, हरीण, रानडुक्कर, ससा आणि मोर यांसारखे विविध वन्यप्राणी आढळतात. पाण्याचे नैसर्गिक स्रोत कमी होत असताना हे प्राणी पिण्याच्या पाण्यासाठी तलावांवर अवलंबून असतात. अशा परिस्थितीत तलावांमधील पाणी वन्यजीवांसाठी राखीव ठेवण्यात यावे, अशी मागणी यापूर्वीही करण्यात आली होती.
काही तलावांमधील विद्युत मोटारी काढण्यात आल्याची माहिती असली तरी परिसरातील काही तलावांमधून अद्यापही पाण्याचा उपसा सुरू असल्याचे नागरिकांचे म्हणणे आहे. हा उपसा असाच सुरू राहिला, तर डिसेंबरअखेर अनेक तलावांमधील उर्वरित पाणीसाठाही संपण्याची शक्यता व्यक्त केली जात आहे. परिणामी वन्यप्राण्यांसह पाळीव जनावरांनाही पाण्यासाठी अडचणींचा सामना करावा लागू शकतो.
या गंभीर परिस्थितीकडे ग्रामपंचायत प्रशासन आणि महसूल विभागाच्या अधिकाऱ्यांनी लक्ष देऊन तातडीने आवश्यक ती कारवाई करावी, अशी मागणी होत आहे. उपलब्ध पाणीसाठ्याचे योग्य नियोजन करून वन्यजीवांना पिण्यासाठी पाणी उपलब्ध राहील, याची खबरदारी घेण्याची गरज नागरिकांनी व्यक्त केली आहे.
माजी सरपंच कमलाकर गवई यांनी दिलेल्या पत्रकातूनही हा प्रश्न उपस्थित करण्यात आला आहे. तलावांमधील पाणी उपसा त्वरित बंद करून वन्यप्राण्यांसाठी पाणीसाठा राखीव ठेवावा, अशी मागणी त्यांनी केली आहे. आता या मागणीची दखल घेऊन महसूल विभाग आणि संबंधित ग्रामपंचायत प्रशासन नेमकी काय भूमिका घेते, याकडे साखरखेर्डा परिसरातील नागरिकांचे लक्ष लागले आहे.
📲 बुलढाणा जिल्ह्यातील ताज्या बातम्या सर्वप्रथम मिळवा!
स्थानिक बातम्या, शेती, बाजारभाव, सरकारी योजना आणि महत्त्वाच्या घडामोडींसाठी KattaNews च्या WhatsApp ग्रुपमध्ये सहभागी व्हा.
वाचकांसाठी महत्त्वाचे
आपल्या परिसरातील पाणीटंचाई, तलावांची स्थिती किंवा वन्यजीवांशी संबंधित काही समस्या आपल्या निदर्शनास आल्यास आम्हाला कळवा. स्थानिक प्रश्नांना व्यासपीठ देण्यासाठी KattaNews शी संपर्क साधा.
आपली बातमी, आपल्या परिसराचा आवाज!










