बुलढाणा,प्रतिनिधी|विशाल गवई
बुलढाणा जिल्ह्यातील कृषी क्षेत्राला हादरवणारी घटना समोर आली आहे. जिथे भविष्यातील कृषी तज्ज्ञ घडवले जातात, त्याच डॉ. राजेंद्र गोडे कृषी महाविद्यालयात बेकायदेशीर जैव उत्तेजक खतांचा मोठा साठा आढळल्याने खळबळ उडाली आहे.
‘कृषी मित्र’ भरती परीक्षेच्या नावाखाली परीक्षार्थींना विनापरवाना जैव उत्तेजक उत्पादने वितरित केली जात असल्याचा गंभीर प्रकार कृषी विभागाच्या छाप्यात उघडकीस आला आहे.
👉 विशेष जाहिरात | अधिक माहितीसाठी क्लिक करा
२८ जून रोजी तालुका कृषी अधिकारी भास्कर राहाणे यांच्या पथकाने अचानक महाविद्यालयाच्या सभागृहात छापा टाकला. त्यावेळी सुरू असलेल्या प्रक्रियेत मोठ्या प्रमाणात अनियमितता आढळली.
छाप्यात “क्रॉप बूस्टर” नावाचे जैव उत्तेजक उत्पादन कोणत्याही वैध परवान्याशिवाय वितरित होत असल्याचे समोर आले. घटनास्थळावरून हिंदुस्तान अॅग-टेक बायोटेक प्रा. लि. कंपनीचे ८ मोठे बॉक्स जप्त करण्यात आले. या मुद्देमालाची किंमत सुमारे १ लाख ५३ हजार ६०० रुपये इतकी आहे.
तपासादरम्यान समोर आलेल्या माहितीनुसार, कारवाईपूर्वीच सुमारे ८० पाकिटे परीक्षार्थींना वितरित करण्यात आली होती. त्यामुळे हा प्रकार केवळ साठा नव्हे तर वितरण स्तरावरही झाल्याचे स्पष्ट झाले आहे.
या प्रकरणात कंपनी संचालक दत्ता पांडुरंग जाधव यांच्याविरुद्ध बुलढाणा शहर पोलीस ठाण्यात गुन्हा दाखल करण्यात आला आहे. त्यांच्यावर खत नियंत्रण आदेश १९८५ तसेच अत्यावश्यक वस्तू कायदा १९५५ अंतर्गत गंभीर कलमे लावण्यात आली आहेत. पुढील तपास पोलीस उपनिरीक्षक धारकरी करीत आहेत.
दरम्यान, या घटनेनंतर महाविद्यालय प्रशासनाची भूमिका संशयाच्या भोवऱ्यात आली आहे. भरती प्रक्रियेच्या नावाखाली एवढ्या मोठ्या प्रमाणात बेकायदेशीर खतांचा साठा कसा आला, याबाबत प्रश्न उपस्थित होत आहेत. स्थानिक नागरिकांमध्ये आर्थिक साटेलोट्याची शक्यता असल्याचीही चर्चा सुरू आहे, मात्र याबाबत कोणताही अधिकृत पुरावा समोर आलेला नाही.
या घटनेमुळे जिल्ह्यातील कृषी शिक्षण संस्थांवरील विश्वासाला धक्का बसला असून कठोर चौकशीची मागणी जोर धरत आहे.
📢 वाचकांसाठी: अशाच ताज्या, स्थानिक आणि विश्वासार्ह बातम्यांसाठी KattaNews.in ला नियमित भेट द्या. ही बातमी शेअर करून जनजागृती करा.
