डोणगाव |माधव भांदुर्गे
डोणगाव-मालेगाव मार्गावर माता अनुसया वेअर हाऊसजवळ २० नोव्हेंबर रोजी रात्री साडेसात वाजेच्या सुमारास भीषण अपघात घडला. अज्ञात वाहनाने दिलेल्या धडकेत एका अनोळखी व्यक्तीचा मृत्यू झाला. अपघातातील मृतदेहाची अवस्था गंभीर असल्याने मृत व्यक्तीची ओळख पटविण्यात अडचणी येत आहेत. दरम्यान, अपघातानंतर घटनास्थळावरून निघून गेलेल्या वाहनाचाही अद्याप शोध लागलेला नाही.
मिळालेल्या माहितीनुसार, डोणगावपासून सुमारे दोन किलोमीटर अंतरावर असलेल्या माता अनुसया वेअर हाऊसजवळ ही घटना घडली. डोणगाव-मालेगाव रस्त्यावरून जात असताना अज्ञात वाहनाने संबंधित व्यक्तीला जोरदार धडक दिली. या अपघातात त्या व्यक्तीचा जागीच मृत्यू झाल्याची प्राथमिक माहिती आहे. धडकेची तीव्रता इतकी होती की मृतदेह छिन्नविछिन्न अवस्थेत आढळून आला.
घटनेची माहिती मिळताच डोणगाव पोलीस स्टेशनचे उपपोलीस निरीक्षक विजय अजमिरे यांनी घटनास्थळी धाव घेतली. पोलिसांनी घटनास्थळाचा पंचनामा करून मृतदेह उत्तरीय तपासणीसाठी मेहकर येथे पाठविला. मृत व्यक्तीची ओळख पटविण्याचे प्रयत्न सुरू असून, अपघात नेमका कोणत्या वाहनामुळे झाला, याचाही पोलीस तपास करीत आहेत.
दरम्यान, घटनास्थळापासून जवळच पुलाखाली MH 37 AG 2552 क्रमांकाची पल्सर दुचाकी आढळल्याची माहिती समोर आली आहे. या दुचाकीवरील चालक जखमी असल्याची चर्चा असून, तो रिसोड तालुक्यातील लेहणी येथील विठ्ठल मोरे असल्याचे बोलले जात आहे. मात्र, या माहितीला अधिकृत दुजोरा मिळालेला नसल्याने त्याबाबत पोलिसांकडून पुष्टी होणे आवश्यक आहे. या दुचाकीचा आणि मुख्य अपघाताचा नेमका संबंध काय, हे तपासानंतरच स्पष्ट होणार आहे.
बातमी लिहीपर्यंत मृत व्यक्तीची ओळख पटलेली नव्हती. तसेच धडक देऊन पसार झालेल्या वाहनाचीही माहिती मिळालेली नव्हती. डोणगाव परिसरात घडलेल्या या अपघातामुळे नागरिकांमध्ये चिंता व्यक्त होत असून, पोलिसांच्या तपासाकडे सर्वांचे लक्ष लागले आहे.
अपघाताबाबत किंवा मृत व्यक्तीच्या ओळखीबाबत कोणाकडे माहिती असल्यास डोणगाव पोलिसांशी संपर्क साधावा.
📲 बुलढाणा जिल्ह्यातील ताज्या बातम्या सर्वप्रथम मिळवा!
ही बातमी शेअर करा: डोणगाव-मालेगाव मार्गावरील या अपघाताची माहिती अधिकाधिक नागरिकांपर्यंत पोहोचवा. मृत व्यक्तीची ओळख पटविण्यासाठी ही माहिती उपयुक्त ठरू शकते.
बुलढाणा जिल्ह्यातील ताज्या बातम्या, ब्रेकिंग न्यूज आणि स्थानिक घडामोडींसाठी आत्ताच भेट द्या 👉 https://kattanews.in/
Katta News – बातमी आपल्या गावाची, आवाज आपल्या माणसांचा!










