दुसरबीड | ३ फेब्रुवारी २०२६
मुंबई ते नागपूर समृद्धी महामार्गावर आज दुपारी साडेतीन वाजेच्या सुमारास भीषण अपघात झाला.
दुसरबीड जवळील कॉरिडोर चॅनल क्रमांक 309 येथे कार चालकाला झोपेची डुलकी आल्याने कारवरील नियंत्रण सुटले आणि भरधाव वेगातील कार थेट रस्त्याच्या कडेला असलेल्या बॅरिकेटला धडकली.
या अपघातात कारमधील चार प्रवासी गंभीर जखमी झाले असून त्यांना तातडीने मेहकर येथील रुग्णालयात दाखल करण्यात आले आहे.
अपघातग्रस्त कारचा क्रमांक MH 01 BU 9995 असून सदर कार नांदेडहून मुंबईकडे जात होती.
धडकेनंतर कारचा पुढील भाग पूर्णतः चुरगळला असून अपघाताची तीव्रता मोठी होती.
या कारमध्ये एकूण सहा प्रवासी प्रवास करत होते.
यामध्ये उद्धव लादवड, गंगासागर लादवड, विजया निमवड, देवांश लादवड, वेदांत लादवड आणि प्रशांत यांचा समावेश आहे.
यापैकी चार जण गंभीर जखमी झाले आहेत.
घटनेची माहिती मिळताच कर्तव्यावर असलेले 108 रुग्णवाहिका चालक सुभाष पंचाळ आणि डॉ. मंगेश काळे यांनी तातडीने घटनास्थळी दाखल होऊन जखमींना मेहकर येथील रुग्णालयात उपचारासाठी दाखल केले.
समृद्धी महामार्गावर वेगमर्यादा आणि दीर्घ प्रवासामुळे चालकांना थकवा येत असून, अशा अपघातांचे प्रमाण वाढत असल्याचे दिसून येत आहे.
वाहन चालविताना विश्रांती घेणे अत्यंत आवश्यक असल्याचे पुन्हा एकदा या घटनेतून समोर आले आहे.
संबंधित बातम्या
