सक्तीची कर्जवसुली थांबवा, स्मार्ट मीटर हटवा! मोताळ्यात वंचित बहुजन आघाडीचा प्रशासनाला अल्टिमेटम

मोताळा : संदिप धुरंधर 

मोताळा तालुक्यातील शेतकरी, शेतमजूर, महिला आणि सर्वसामान्य नागरिकांच्या प्रश्नांवर वंचित बहुजन आघाडीने आक्रमक भूमिका घेतली आहे. मायक्रो फायनान्स कंपन्यांकडून होत असल्याचा आरोप असलेली सक्तीची कर्जवसुली, स्मार्ट मीटर आणि अवाढव्य वीजबिलांच्या प्रश्नांसह विविध मागण्यांचे निवेदन वंचित बहुजन आघाडीच्या मोताळा तालुका पदाधिकाऱ्यांनी माननीय तहसीलदार यांना सादर केले. मागण्या पूर्ण न झाल्यास तीव्र आंदोलन छेडण्याचा इशाराही यावेळी देण्यात आला.

वंचित बहुजन आघाडीचे जिल्हा नेते प्रशांत भाऊ वाघोदे यांच्या मार्गदर्शनाखाली आणि तालुका अध्यक्ष समाधान भाई डोंगरे यांच्या नेतृत्वात हा कार्यक्रम पार पडला. यावेळी प्रशांत वाघोदे यांनी विविध जनहिताच्या मुद्द्यांवर प्रशासनाचे लक्ष वेधले.

बुलढाणा विधानसभा मतदारसंघाचे आमदार संजय गायकवाड यांनी मागील काही दिवसांत शेतकऱ्यांबाबत केलेल्या विधानाचा वंचित बहुजन आघाडीकडून निषेध करण्यात आला. संबंधित विधानाच्या पार्श्वभूमीवर आमदार संजय गायकवाड यांना सभागृहातून निलंबित करण्याची मागणी करण्यात आली. यासंदर्भातील निवेदन तहसीलदार यांच्या माध्यमातून मुख्यमंत्री देवेंद्र फडणवीस यांच्याकडे पाठवण्यात आले.

दुष्काळी परिस्थितीमुळे शेतकरी, शेतमजूर आणि भूमिहीन नागरिकांच्या हाताला काम नसल्याने अनेक कुटुंबांसमोर आर्थिक अडचणी निर्माण झाल्या आहेत. अशा परिस्थितीत मायक्रो फायनान्स कंपन्यांकडून घेतलेल्या कर्जाची परतफेड करणे नागरिकांना कठीण होत असल्याचा मुद्दा निवेदनात मांडण्यात आला. फायनान्स कंपन्यांचे एजंट अतिरिक्त व्याज आणि घरावर जप्ती येण्यासारख्या बाबी सांगून महिलांना तसेच कर्जदारांना भयभीत करत असल्याचा आरोप वंचित बहुजन आघाडीने केला.

मुख्यमंत्री आणि महसूल मंत्र्यांनी सक्तीची कर्जवसुली करू नये, अशी भूमिका मांडलेली असतानाही काही मायक्रो फायनान्स कंपन्यांकडून सक्तीची वसुली सुरू असल्याचा आरोप यावेळी करण्यात आला. संबंधित कंपन्यांना समज देऊन महिलांसह कर्जदारांना दिलासा द्यावा, अन्यथा वंचित बहुजन आघाडीच्या वतीने तीव्र आंदोलन करण्यात येईल, असा इशारा देण्यात आला.

सक्तीने बसवण्यात येणारे स्मार्ट मीटर आणि अवाढव्य वीजबिलांच्या प्रश्नावरही वंचित बहुजन आघाडीने आवाज उठवला. या मागणीसाठी मोर्चा महावितरण कार्यालयाकडे वळवण्यात आला. तेथे उपस्थित असलेले डाबरे साहेब यांच्याशी पदाधिकाऱ्यांनी चर्चा केली.

स्मार्ट मीटर सक्तीने का बसवण्यात आले, त्यासंदर्भातील आदेश किंवा पत्र देण्यात यावे, नॉनफॉल्टी मीटर का काढण्यात आले, चुकीची वीजबिले कमी करून द्यावीत आणि नॉनफॉल्टी मीटर ३० दिवसांच्या आत पुन्हा बसवण्यात यावेत, अशा मागण्या यावेळी करण्यात आल्या. मागण्या पूर्ण न झाल्यास महावितरण कार्यालयात बसवलेल्या स्मार्ट मीटरची होळी करण्यात येईल, असा अल्टिमेटम वंचित बहुजन आघाडीने दिला.

या निवेदनाला तळणी येथील युवा संघर्ष टीम या सामाजिक संघटनेने सहभागी होत जाहीर पाठिंबा दिला.

यावेळी वंचित बहुजन आघाडीचे तालुका महासचिव विशाल भाऊ मोरे, विलास भाऊ प्रधान, तालुका प्रसिद्धी प्रमुख सागर बोदडे, BSI तालुका अध्यक्ष संजय गुरचवले, पंजाबराव जाधव, सागर धुरंधर, WD वानखेडे सर, रोहन सावळे यांच्यासह वंचित बहुजन आघाडीचे कार्यकर्ते आणि युवा संघर्ष टीम तळणीचे पदाधिकारी उपस्थित होते.

मोताळा तालुक्यातील शेतकरी, महिला, वीज ग्राहक आणि सर्वसामान्य नागरिकांच्या प्रश्नांवर आता प्रशासन काय भूमिका घेते, याकडे नागरिकांचे लक्ष लागले आहे. मायक्रो फायनान्स कर्जवसुली, स्मार्ट मीटर आणि अवाढव्य वीजबिलांच्या मागण्यांवर संबंधित विभागाकडून काय कार्यवाही होते, हे पाहणे महत्त्वाचे ठरणार आहे.