२९ जुलैला बुलढाण्यात अनुसूचित जाती उपवर्गीकरणाविरोधात जिल्हास्तरीय महामोर्चा; आनंदराज आंबेडकरांसह प्रमुख नेते उपस्थित राहणार

बुलढाणा | विशाल गवई 

अनुसूचित जातींच्या उपवर्गीकरणाच्या निर्णयाविरोधात राज्यभरात आंदोलनाची भूमिका अधिक तीव्र होत असताना बुलढाणा जिल्ह्यातही मोठ्या जनआंदोलनाची तयारी सुरू झाली आहे. अनुसूचित जाती उपवर्गीकरण विरोधी संघर्ष समिती, बुलढाणा जिल्हाच्या वतीने मंगळवार, २९ जुलै २०२६ रोजी सकाळी ११ वाजता जिल्हास्तरीय महामोर्चाचे आयोजन करण्यात आले आहे. या महामोर्चात हजारो नागरिक सहभागी होतील, असा विश्वास आयोजकांनी व्यक्त केला आहे.

महामोर्चाची सुरुवात जिजामाता प्रेक्षागृह, बुलढाणा येथून होणार आहे. जिल्ह्यातील सर्व तालुक्यांमधून नागरिक, युवक, महिला, विद्यार्थी, सामाजिक कार्यकर्ते आणि विविध आंबेडकरी संघटनांचे पदाधिकारी मोठ्या संख्येने सहभागी होणार असल्याचे सांगण्यात आले आहे.

👉 विशेष जाहिरात | अधिक माहितीसाठी क्लिक करा

उपवर्गीकरणाच्या निर्णयामुळे अनुसूचित जाती समाजाच्या घटनात्मक हक्कांवर परिणाम होऊ शकतो, अशी भूमिका संघर्ष समितीने मांडली आहे. त्यामुळे शासनाने या निर्णयाचा फेरविचार करून सामाजिक न्यायाच्या तत्त्वांचे संरक्षण करावे, अशी प्रमुख मागणी आंदोलनाच्या माध्यमातून करण्यात येणार आहे.

या महामोर्चात सरसेनानी आनंदराज आंबेडकर, भीमरावजी आंबेडकर, खासदार चंद्रकांत हांडोरे, माजी खासदार जोगेंद्रनाथ कवाडे, आमदार राजकुमार बडोले, माजी आमदार बाबनराव घोलप आणि आमदार सिद्धार्थ खरात यांच्यासह अनेक समाजप्रतिनिधी उपस्थित राहणार असल्याची माहिती आयोजकांनी दिली आहे.

मोर्चा शांततापूर्ण आणि शिस्तबद्ध पद्धतीने पार पडावा यासाठी व्यापक नियोजन करण्यात आले आहे. बुलढाणा जिल्ह्यातील सर्व आंबेडकरी, सामाजिक आणि पुरोगामी संघटनांनी मोठ्या संख्येने सहभागी होऊन आंदोलन यशस्वी करण्याचे आवाहन करण्यात आले आहे.

राज्यात अनुसूचित जाती उपवर्गीकरणाचा विषय चर्चेचा केंद्रबिंदू ठरत असताना बुलढाण्यातील हा जिल्हास्तरीय महामोर्चा विदर्भातील महत्त्वाच्या आंदोलनांपैकी एक मानला जात आहे. त्यामुळे या आंदोलनाकडे प्रशासनासह राज्यभरातील विविध सामाजिक संघटनांचे लक्ष लागले आहे.

Related News

• जास्तीच्या मजुरीच्या आमिषाने गेला जीव! खडकपूर्णा प्रकल्पात बुडालेली बोट काढताना मजुराचा दुर्दैवी मृत्यू; तिघे पोलिसांच्या ताब्यात
• लाडक्या बहिणींसाठी मोठी खुशखबर! आषाढी एकादशीला 26 वस्तूंचे किट; एकनाथ शिंदे यांनी सांगितली संपूर्ण माहिती
• गरीबांच्या ताटातील घास लुटण्याचा प्रयत्न? बुलढाण्यात 41 क्विंटल सरकारी रेशनचा तांदूळ जप्त; पोलिसांची मोठी कारवाई