चिखली प्रतिनिधी |विशाल गवई
शुक्रवारी (दि. 26 जून) देण्यात आलेल्या निवेदनात म्हटले आहे की, पत्रकारांनी एका वादग्रस्त विधानाबाबत स्पष्टीकरण विचारले असता खासदारांनी पत्रकारांना अर्वाच्य भाषेत शिवीगाळ केली आणि “पुन्हा विचारायला आलात तर मारून पाठवीन” अशी धमकी दिल्याचा आरोप आहे. पत्रकार संघाने या प्रकाराला लोकशाहीच्या चौथ्या स्तंभावर झालेला गंभीर आघात असल्याचे म्हटले आहे.
पत्रकार संघाच्या म्हणण्यानुसार, पत्रकारांना निर्भयपणे आणि कोणत्याही दबावाशिवाय आपले कर्तव्य बजावता यावे, यासाठी पत्रकार संरक्षण कायद्याची प्रभावी अंमलबजावणी होणे आवश्यक आहे. त्यामुळे संबंधित प्रकरणात तातडीने गुन्हा दाखल करून निष्पक्ष चौकशी करावी, अशी मागणी करण्यात आली आहे.
चिखली तालुका पत्रकार संघाचे अध्यक्ष नितीन फुलझाडे यांच्या नेतृत्वाखाली हे निवेदन चिखली पोलीस स्टेशनचे वरिष्ठ पोलीस निरीक्षक भूषण गावंडे आणि सहाय्यक पोलीस निरीक्षक नितीन चव्हाण यांच्याकडे सुपूर्द करण्यात आले.
यावेळी जेष्ठ पत्रकार संतोष लोखंडे, कैलास गाडेकर, रमाकांत कपूर, रविंद्र फोलाने, इफ्तेखार खान, महेश गोंधणे, छोटू कांबळे, भरत जोगदंडे, रमिझ राजा, कमलाकर खेडेकर, योगेश शर्मा, सय्यद साहिल, राजेश बिडवे, किरण शेजोळ, ऋषी भोपळे यांच्यासह तालुक्यातील अनेक पत्रकार उपस्थित होते.
नितीन फुलझाडे म्हणाले : “पत्रकारांना धमकावणे किंवा त्यांच्या कामात अडथळा निर्माण करणे कोणत्याही परिस्थितीत मान्य होणार नाही. संबंधित खासदाराविरोधात तात्काळ गुन्हा दाखल करून कठोर कायदेशीर कारवाई करण्यात यावी. अन्यथा अखिल भारतीय मराठी पत्रकार संघ अंतर्गत चिखली तालुका पत्रकार संघाच्या वतीने तीव्र आंदोलन करण्यात येईल. त्याची संपूर्ण जबाबदारी शासन आणि प्रशासनाची राहील.”
पत्रकार संघाने शासनाने या प्रकरणात तातडीने निर्णय घेऊन पत्रकारांच्या सुरक्षिततेबाबत ठोस भूमिका घ्यावी, अशी अपेक्षा व्यक्त केली आहे.
📢 वाचकांसाठी महत्त्वाचे
तुमच्या परिसरातील ताज्या, विश्वासार्ह आणि वेगवान बातम्यांसाठी KattaNews.in ला नियमित भेट द्या. ही बातमी उपयुक्त वाटल्यास आपल्या मित्र-परिवारासोबत शेअर करा.
Related News
