साखरखेर्डा | प्रा.दिलीप नाईकवाड
एक धाडसी कारवाई, गुन्हेगारीवर मोठा घाव, अंमली पदार्थ माफियावर निर्णायक प्रहार, आणि जनतेत पुन्हा निर्माण झालेला विश्वास—अशी ही कहाणी आहे साखरखेर्डा पोलीस ठाण्याचे ठाणेदार गजानन करेवाड यांच्या नेतृत्वाची. १ कोटी ३२ लाख रुपयांच्या अंमली पदार्थांच्या मोठ्या कारवाईत आरोपींना जेरबंद करत त्यांनी केवळ गुन्हेगारीला आळा घातला नाही, तर संपूर्ण परिसरात कायद्याचा धाक निर्माण केला. या उल्लेखनीय कामगिरीबद्दल त्यांचा विशेष पोलीस महानिरीक्षक रामनाथ पोकळे यांच्या हस्ते सन्मान करण्यात आला असून या घटनेची राज्यभरात चर्चा रंगली आहे.
यवतमाळ जिल्ह्यातून बदली होऊन २९ जुलै २०२४ रोजी साखरखेर्डा येथे कार्यभार स्वीकारलेल्या गजानन करेवाड यांनी अत्यंत संवेदनशील मानल्या जाणाऱ्या या भागात कायदा व सुव्यवस्था राखण्याचे मोठे आव्हान स्वीकारले. शांत, संयमी पण कर्तव्यदक्ष व्यक्तिमत्त्वाच्या जोरावर त्यांनी अल्प पोलिस बळातही प्रभावी कामगिरी करत आपली वेगळी ओळख निर्माण केली.
👉 विशेष जाहिरात | अधिक माहितीसाठी क्लिक करा
त्यांनी सर्वप्रथम सामाजिक सलोखा निर्माण करण्यावर भर दिला. पूर्वी जातीय तणावाची पार्श्वभूमी असलेल्या गावात जनतेशी थेट संवाद साधत विश्वासाचे वातावरण तयार केले. गणेशोत्सव, दुर्गोत्सव, बकरी ईद, रामनवमी, शिवजयंती, डॉ. बाबासाहेब आंबेडकर जयंती यांसारखे सण शांततेत पार पडले. उत्कृष्ट काम करणाऱ्या गणेश मंडळांचा सन्मान करून त्यांनी समाजातील सकारात्मकतेला चालना दिली.
गुन्हेगारी नियंत्रणात त्यांनी घेतलेल्या धाडसी निर्णयांमुळे परिसरात मोठा बदल दिसून आला. भाग पाचच्या गुन्ह्यांमध्ये लक्षणीय घट झाली. १४ कुख्यात आरोपींना तडीपार करून गावातील दहशत कमी करण्यात यश आले. जानेवारी २०२५ मध्ये सूतगिरणी परिसरातील दरोड्याचा अवघ्या १२ तासांत छडा लावून सर्व आरोपींना अटक करण्यात आली. पेनटाकळी येथील खुनाच्या कटातील आरोपींनाही तात्काळ अटक करण्यात आली.
हरियाणा राज्याशी संबंधित पाणीपुरवठा पाईप चोरी प्रकरणाचा पर्दाफाश करत मोठ्या टोळीला गजाआड करण्यात आले. जुगार आणि अवैध दारू अड्ड्यांवर मोठ्या प्रमाणात छापे टाकून लाखो रुपयांचा ऐवज जप्त करण्यात आला. २७ वर्षांपासून प्रलंबित असलेला अतिक्रमणाचा प्रश्न सोडवण्यातही त्यांनी महत्त्वाची भूमिका बजावली.
घरफोडी आणि चोरीच्या अनेक गुन्ह्यांची उकल करून आरोपींना अटक करण्यात आली. बलात्कार प्रकरणे आणि अल्पवयीन मुलींच्या अपहरणाच्या गुन्ह्यांमध्येही जलद कारवाई करण्यात आली. कायदा सर्वांसाठी समान आहे हे तत्व त्यांनी कठोरपणे अंमलात आणले.
साखरखेर्डा शहरात सीसीटीव्ही कॅमेरे बसवणे, नियमित गस्त, संशयितांवर नजर ठेवणे आणि माहिती संकलनाची मजबूत यंत्रणा उभारणे यामुळे गुन्हेगारीवर प्रभावी नियंत्रण मिळवण्यात आले. “गुन्हा झाल्यानंतर कारवाई करण्यापेक्षा गुन्हा होण्याआधी प्रतिबंध करणे अधिक प्रभावी” हा त्यांचा दृष्टिकोन स्पष्ट दिसून येतो.
त्यांच्या नेतृत्वाखाली पोलीस यंत्रणा अधिक सक्षम झाली असून कर्मचारीही आत्मविश्वासाने काम करत आहेत. साधेपणा, शिस्त, स्पष्टवक्तेपणा आणि माणुसकी यांचा संगम असलेले त्यांचे व्यक्तिमत्त्व समाजासाठी प्रेरणादायी ठरत आहे.
या उल्लेखनीय कार्याबद्दल विशेष पोलीस महानिरीक्षकांच्या हस्ते सन्मानित झाल्याने गजानन करेवाड यांचे सर्व स्तरातून कौतुक होत असून साखरखेर्डा पोलीस ठाण्याची प्रतिमा अधिक उंचावली आहे.
📢 हे आवश्यक करा
अशाच ताज्या, विश्वासार्ह आणि व्हायरल बातम्यांसाठी Kattanews.in ला दररोज भेट द्या. तुमच्या परिसरातील बातमी आम्हाला पाठवण्यासाठी आमच्याशी संपर्क साधा.
