देवीसमोर हात जोडले, नंतर त्याच गाभाऱ्यात चोरी केली! मर्दडीच्या जागृत देवस्थानातील धक्कादायक प्रकार CCTV मध्ये कैद

बुलढाणा/भागवत गायकवाड 

श्रद्धेच्या मंदिरातच विश्वासाला धक्का देणारी घटना बुलढाणा जिल्ह्यातून समोर आली आहे. मर्दडी येथील प्रसिद्ध आणि जागृत देवस्थान असलेल्या देवी मंदिरात अज्ञात चोरट्यांनी धाडसी चोरी केल्याने परिसरात मोठी खळबळ उडाली आहे. धक्कादायक बाब म्हणजे चोरी करण्यापूर्वी चोरट्यांनी देवीसमोर हात जोडून दर्शन घेतले आणि त्यानंतर त्याच गाभाऱ्यात चोरी केल्याचे CCTV फुटेजमध्ये दिसून आल्याची माहिती आहे.

या प्रकारामुळे मंदिर प्रशासनासह भाविकांमध्ये संतापाचे वातावरण निर्माण झाले असून, श्रद्धास्थान असलेल्या मंदिरात अशा प्रकारची घटना घडल्याने अनेकांनी नाराजी व्यक्त केली आहे.

प्राथमिक माहितीनुसार, अज्ञात चोरट्यांनी मंदिराच्या मागील बाजूचा दरवाजा तोडून आत प्रवेश केला. त्यानंतर थेट गाभाऱ्यात जाऊन देवीच्या अंगावरील मौल्यवान दागिने आणि चांदीचा ऐवज लंपास केला.

चोरट्यांनी देवीच्या अंगावरील सोन्याचे चार मंगळसूत्र, देवीच्या डोक्यावरील चांदीचा टोप तसेच चांदीची पादत्राणे असा लाखो रुपयांचा ऐवज चोरी केल्याची प्राथमिक माहिती समोर आली आहे.

या चोरीतील सर्वात धक्कादायक बाब म्हणजे चोरट्यांची पद्धत. मंदिरात प्रवेश करण्यापूर्वी त्यांनी चप्पल बाहेर काढली, देवीचे दर्शन घेतले आणि त्यानंतर नियोजनबद्ध पद्धतीने चोरी केली. CCTV फुटेजमध्ये संशयित व्यक्तींच्या हालचाली कैद झाल्या असून, पोलिसांकडून या फुटेजच्या आधारे तपास सुरू करण्यात आला आहे.

घटनेची माहिती मिळताच पोलिसांनी तातडीने घटनास्थळी धाव घेतली. ठाणेदार अजिनाथ मोरे यांनी घटनास्थळाची पाहणी करून तपासाची सूत्रे हाती घेतली आहेत. CCTV फुटेज, तांत्रिक पुरावे आणि चोरट्यांच्या हालचालींच्या आधारे पोलिसांची विविध पथके आरोपींचा शोध घेत आहेत.

पोलीस अधीक्षक निलेश तांबे यांच्या मार्गदर्शनाखाली ठाणेदार अजिनाथ मोरे आणि त्यांचे पथक या प्रकरणाचा कसून तपास करत आहेत. चोरी करणाऱ्या आरोपींना लवकरात लवकर ताब्यात घेण्यासाठी पोलिसांकडून प्रयत्न सुरू आहेत.

मर्दडी येथील हे देवस्थान परिसरातील हजारो भाविकांचे श्रद्धास्थान मानले जाते. त्यामुळे मंदिरातील या चोरीचा तातडीने छडा लावून आरोपींवर कठोर कारवाई करावी, अशी मागणी भाविकांकडून केली जात आहे.