टीबीमुक्त बुलढाणासाठी सीईओ गुलाब खरात यांचा मोठा पुढाकार; सहा महिन्यांसाठी टीबी रुग्ण दत्तक

बुलढाणा | भागवत गायकवाड 

टीबीमुक्त भारताच्या दिशेने बुलढाणा जिल्ह्यातून एक प्रेरणादायी पाऊल उचलण्यात आले आहे. जिल्हा परिषद बुलढाणाचे मुख्य कार्यकारी अधिकारी गुलाब खरात यांनी सामाजिक बांधिलकी जपत एका क्षयरोग (टीबी) रुग्णाला पुढील सहा महिन्यांसाठी दत्तक घेतले आहे. ‘निक्षय मित्र’ उपक्रमांतर्गत त्यांनी रुग्णाच्या पोषण आहाराची संपूर्ण जबाबदारी स्वीकारत टीबीमुक्त बुलढाणाच्या अभियानाला नवी ऊर्जा दिली आहे. प्रशासनातील वरिष्ठ अधिकाऱ्याने स्वतः पुढाकार घेतल्याने जिल्हाभर या उपक्रमाचे स्वागत होत असून, समाजातील दानशूर व्यक्ती, स्वयंसेवी संस्था, उद्योजक आणि लोकप्रतिनिधींनाही पुढे येण्याची प्रेरणा मिळत आहे.

केंद्र शासनाच्या प्रधानमंत्री टीबी मुक्त भारत अभियान अंतर्गत देशभरात टीबीमुक्त भारताचे उद्दिष्ट ठेवण्यात आले आहे. या अभियानात ‘निक्षय मित्र’ ही संकल्पना राबविण्यात येत असून, समाजातील विविध घटकांनी टीबी रुग्णांना पोषण आहार आणि मानसिक आधार देण्यासाठी पुढाकार घ्यावा, असे आवाहन करण्यात आले आहे. बुलढाणा जिल्ह्यात या अभियानाला अधिक गती देण्यासाठी मुख्य कार्यकारी अधिकारी गुलाब खरात यांनी स्वतः एका टीबी रुग्णाला दत्तक घेत आदर्श निर्माण केला आहे.

👉 विशेष जाहिरात | अधिक माहितीसाठी क्लिक करा

रुग्णाला पोषण आहाराचे किट सुपूर्द करताना अतिरिक्त मुख्य कार्यकारी अधिकारी व्ही. एम. मोहन, उपमुख्य कार्यकारी अधिकारी (पंचायत) शिवकर भारसाकळे, जिल्हा क्षयरोग अधिकारी डॉ. वर्षा तसेच आरोग्य केंद्राचे वैद्यकीय अधिकारी डॉ. दिनकर खेडकर यांची उपस्थिती होती. या उपक्रमामुळे प्रशासनातील अधिकारी स्वतः सामाजिक जबाबदारी पार पाडत असल्याचा सकारात्मक संदेश समाजात पोहोचला आहे.

निक्षय मित्र योजनेअंतर्गत टीबी रुग्णांना केवळ औषधोपचारच नव्हे, तर उपचाराच्या संपूर्ण कालावधीत आवश्यक असलेला सकस आणि पौष्टिक आहार उपलब्ध करून देण्यावर भर दिला जात आहे. तज्ज्ञांच्या मते योग्य पोषण मिळाल्यास टीबी रुग्णांची रोगप्रतिकारक शक्ती वाढते आणि उपचाराचा परिणाम अधिक प्रभावी ठरतो. त्यामुळे या योजनेचे महत्त्व दिवसेंदिवस वाढत आहे.

मुख्य कार्यकारी अधिकारी गुलाब खरात यांनी स्वीकारलेल्या सहा महिन्यांच्या दत्तक कालावधीत रुग्णाला नियमित पोषण आहार उपलब्ध करून दिला जाणार आहे. दरमहा देण्यात येणाऱ्या न्यूट्रिशन किटमध्ये गहू, ज्वारी, बाजरी, डाळी, खाद्यतेल तसेच दूध अथवा दूध पावडरचा समावेश करण्यात आला आहे. उपचारासोबतच संतुलित आहार मिळाल्यास रुग्ण लवकर बरा होण्यास मदत होते, असा आरोग्य विभागाचा विश्वास आहे.

यावेळी गुलाब खरात यांनी सांगितले की, टीबी हा केवळ आरोग्याचा विषय नसून सामाजिक जबाबदारीचाही भाग आहे. प्रत्येक सक्षम नागरिकाने, लोकप्रतिनिधींनी, अधिकारी, कर्मचारी, स्वयंसेवी संस्था आणि उद्योजकांनी ‘निक्षय मित्र’ म्हणून पुढे येण्याची गरज आहे. प्रत्येक टीबी रुग्णाला पोषण आहार आणि मानसिक आधार मिळाला तर बुलढाणा जिल्हा टीबीमुक्त करण्याचे उद्दिष्ट निश्चितच लवकर साध्य होईल.

आरोग्य विभागाच्या माहितीनुसार, टीबी हा पूर्णपणे उपचाराने बरा होणारा आजार आहे. वेळेत निदान, नियमित औषधोपचार आणि योग्य पोषण आहार यामुळे रुग्ण पूर्णपणे बरा होऊ शकतो. त्यामुळे टीबीबाबत भीती न बाळगता लक्षणे दिसताच त्वरित शासकीय आरोग्य केंद्रात तपासणी करून उपचार सुरू करण्याचे आवाहन करण्यात येत आहे.

मुख्य कार्यकारी अधिकारी गुलाब खरात यांच्या या पुढाकारामुळे बुलढाणा जिल्ह्यातील टीबीमुक्त भारत अभियानाला नवी दिशा मिळाली आहे. वरिष्ठ प्रशासकीय अधिकाऱ्याने स्वतः पुढाकार घेतल्याने इतर अधिकारी, कर्मचारी, सामाजिक संस्था, उद्योजक आणि दानशूर नागरिकही ‘निक्षय मित्र’ म्हणून पुढे येतील, अशी अपेक्षा आरोग्य विभागाने व्यक्त केली आहे.

टीबीमुक्त भारत अभियान यशस्वी करण्यासाठी शासनाकडून औषधोपचार मोफत उपलब्ध करून दिले जातात. मात्र उपचारासोबतच पौष्टिक आहार आणि मानसिक आधार मिळाल्यास रुग्णाचा आत्मविश्वास वाढतो आणि उपचार अधिक प्रभावी ठरतात. त्यामुळे ‘निक्षय मित्र’ उपक्रमाला देशभरात मोठा प्रतिसाद मिळत असून बुलढाणा जिल्हाही या मोहिमेत सक्रिय सहभाग नोंदवत आहे.

जिल्हा परिषद प्रशासनाने जिल्ह्यातील सर्व लोकप्रतिनिधी, अधिकारी, कर्मचारी, उद्योगपती, सामाजिक संस्था आणि नागरिकांना ‘निक्षय मित्र’ म्हणून नोंदणी करण्याचे आवाहन केले आहे. एका टीबी रुग्णाच्या पोषण आहाराची जबाबदारी स्वीकारून प्रत्येक नागरिक या सामाजिक अभियानाचा भाग बनू शकतो. समाजाच्या सहभागातूनच टीबीमुक्त बुलढाणा आणि टीबीमुक्त भारताचे स्वप्न साकार होईल, असा विश्वास प्रशासनाने व्यक्त केला आहे.