बुलढाणा : प्रा.दिलीप नाईकवाड
विदर्भात पुन्हा एकदा पावसाचा जोर वाढण्याची शक्यता असून, मुंबई प्रादेशिक हवामान केंद्राने पुढील पाच दिवसांसाठी हवामानाचा महत्त्वाचा अंदाज जाहीर केला आहे. बुलढाण्यासह विदर्भातील अनेक जिल्ह्यांसाठी विविध तारखांना यलो अलर्ट जारी करण्यात आला असून, मेघगर्जना, विजांचा कडकडाट आणि काही ठिकाणी जोरदार पावसाचा इशारा देण्यात आला आहे. त्यामुळे नागरिकांसह शेतकऱ्यांनी विशेष सतर्कता बाळगण्याचे आवाहन हवामान विभागाने केले आहे.
हवामान विभागाच्या अंदाजानुसार १ ऑगस्ट रोजी बुलढाणा, अकोला, वाशिम, अमरावती, यवतमाळ, वर्धा, नागपूर, भंडारा, चंद्रपूर, गोंदिया आणि गडचिरोली जिल्ह्यांसाठी यलो अलर्ट जारी करण्यात आला आहे. या भागांमध्ये मेघगर्जनेसह पाऊस, विजांचा कडकडाट आणि काही ठिकाणी जोरदार सरी कोसळण्याची शक्यता व्यक्त करण्यात आली आहे.
👉 विशेष जाहिरात | अधिक माहितीसाठी क्लिक करा
२ ऑगस्ट रोजी अकोला, वाशिम, अमरावती, गोंदिया, चंद्रपूर आणि गडचिरोली जिल्ह्यांमध्ये मेघगर्जनेसह पावसाचा अंदाज आहे. तर ३ ऑगस्ट रोजी बुलढाणा, अकोला, अमरावती आणि नागपूर जिल्ह्यांमध्ये पुन्हा यलो अलर्ट कायम ठेवण्यात आला असून विजांच्या कडकडाटासह पावसाची शक्यता वर्तविण्यात आली आहे.
४ ऑगस्ट रोजी बुलढाणा, यवतमाळ, वर्धा, नागपूर, भंडारा, गोंदिया, चंद्रपूर आणि गडचिरोली जिल्ह्यांमध्ये मेघगर्जना व विजांच्या कडकडाटासह पावसाचा इशारा देण्यात आला आहे. तसेच ५ ऑगस्ट रोजी बुलढाणा, वर्धा, नागपूर, भंडारा, गोंदिया, चंद्रपूर आणि गडचिरोली जिल्ह्यांसाठी पुन्हा यलो अलर्ट जारी करण्यात आला आहे.
दरम्यान, बुलढाणा जिल्ह्यात गेल्या दोन दिवसांपासून झालेल्या मुसळधार पावसामुळे अनेक नदी-नाले दुथडी भरून वाहत आहेत. काही भागातील शेतांमध्ये पाणी साचल्याने खरीप पिकांबाबत शेतकऱ्यांची चिंता वाढली आहे. पुढील काही दिवसही पावसाचा जोर कायम राहण्याची शक्यता असल्याने जिल्हा प्रशासन, आपत्ती व्यवस्थापन यंत्रणा आणि नागरिकांनी आवश्यक ती खबरदारी घेण्याचे आवाहन करण्यात आले आहे.
विजांचा कडकडाट सुरू असताना उघड्या जागेत थांबू नये, मोठ्या झाडाखाली आश्रय घेणे टाळावे, आवश्यक असल्याशिवाय घराबाहेर पडू नये तसेच स्थानिक प्रशासन आणि आपत्ती व्यवस्थापन विभागाच्या सूचनांचे पालन करावे, असे आवाहन हवामान विभागाने केले आहे.
बुलढाणा जिल्ह्यासह महाराष्ट्रातील ताज्या, विश्वासार्ह आणि सर्वात वेगवान बातम्या मिळवण्यासाठी kattanews च्या WhatsApp ग्रुपमध्ये सहभागी व्हा.
