शेगाव | विशाल गवई
नाफेडची खरेदी केलेली तूर रातोरात चोरीला गेल्यानंतर निर्माण झालेल्या खळबळजनक प्रकरणाचा शेगाव शहर पोलिसांनी अवघ्या काही दिवसांत यशस्वी उलगडा केला आहे. सीसीटीव्ही फुटेज आणि तांत्रिक तपासाच्या मदतीने दोन आरोपींना अटक करण्यात आली असून त्यांच्याकडून चोरीस गेलेली तूर, गुन्ह्यात वापरलेले वाहन आणि इतर साहित्य असा एकूण २ लाख ६५ हजार ९०० रुपयांचा मुद्देमाल जप्त करण्यात आला आहे.
व्यंकटेश नगर येथील वैभव दीपक देशमुख यांनी २८ जून रोजी शहर पोलीस ठाण्यात तक्रार दाखल केली होती. त्यांच्या गोदामामध्ये नाफेडची खरेदी केलेली तूर भरलेले २६ कट्टे ठेवण्यात आले होते. त्यापैकी १३ कट्टे अज्ञात चोरट्यांनी चोरून नेल्याचे निदर्शनास आले. चोरीस गेलेल्या १३ क्विंटल तुरीची किंमत सुमारे १ लाख १४ हजार ४०० रुपये असल्याचे फिर्यादीत नमूद करण्यात आले.
👉 विशेष जाहिरात | अधिक माहितीसाठी क्लिक करा
तक्रार दाखल होताच शहर पोलिसांच्या गुन्हे प्रकटीकरण पथकाने तपासाची सूत्रे हाती घेतली. घटनास्थळ परिसरातील सीसीटीव्ही फुटेज तपासण्यात आले. त्यामधून संशयित वाहनाचा माग काढण्यात आला. तपासादरम्यान एमएच ०४ जीसी ३४३० क्रमांकाचे वाहन चोरीसाठी वापरण्यात आल्याचे स्पष्ट झाले.
यानंतर पोलिसांनी विजय राधेश्याम अग्रवाल (वय ३२, रा. शेगाव) याला ताब्यात घेऊन चौकशी केली. चौकशीत त्याने शेख उमरशेख जमीर (वय २३, रा. आळसणा, ता. शेगाव) याच्या साथीने चोरी केल्याची कबुली दिली. त्यानंतर दोघांनाही अटक करण्यात आली.
आरोपींकडून चोरीस गेलेली १३ क्विंटल तूर (१,१४,४०० रुपये), गुन्ह्यात वापरलेले वाहन (१,५०,००० रुपये) तसेच तूर वाहतुकीसाठी वापरण्यात आलेले १५ रिकामे कट्टे (१,५०० रुपये) असा एकूण २ लाख ६५ हजार ९०० रुपयांचा मुद्देमाल पोलिसांनी जप्त केला.
ही उल्लेखनीय कारवाई जिल्हा पोलीस अधीक्षक यांच्या मार्गदर्शनाखाली शहर पोलीस निरीक्षक यांच्या नेतृत्वात गुन्हे प्रकटीकरण पथक तसेच तांत्रिक विश्लेषण शाखेच्या सहकार्याने करण्यात आली. पोलिसांच्या जलद आणि प्रभावी तपासामुळे चोरीचा गुन्हा अल्पावधीत उघडकीस आल्याने नागरिकांनी समाधान व्यक्त केले आहे.
👉 वाचा अशाच विश्वासार्ह आणि वेगवान स्थानिक बातम्या
बुलढाणा जिल्ह्यासह राज्यातील ताज्या घडामोडी, गुन्हे, शेती, शिक्षण, राजकारण आणि सरकारी योजनांच्या अचूक व अपडेट बातम्यांसाठी KattaNews.in ला नियमित भेट द्या.
Related News
