इंस्टाग्रामवर प्रेमाचा एक इमोजी पाठवला अन् तरुणाच्या आयुष्याला बेडी; थेट कारागृहात.

ग्रामीण भागातील १६ वर्षांची मुलगी ऑनलाइन अभ्यासासाठी मोबाइल वापरत होती. अभ्यासाच्या कारणामुळे घरच्यांनी
विश्वासाने मोबाइल दिला होता. त्याच मोबाइलवर इंस्टाग्राम अकाउंट सुरू झाले. गावातीलच १८ वर्षे ९ महिने
वयाचा, कॉलेजमध्ये शिकणारा तरुण तिच्या अकाउंटवर जोडला गेला.

सुरुवातीला संवाद साधा होता—‘हाय’, ‘हॅलो’, ‘अभ्यास झाला का?’ एवढ्यापुरताच. मात्र, कालांतराने
त्या तरुणाने भावना शब्दांत न मांडता इमोजी आणि चिन्हांच्या माध्यमातून व्यक्त करायला सुरुवात केली.
त्याला हा प्रकार साधा वाटला, पण अल्पवयीन मुलीसाठी तो मानसिक त्रास देणारा ठरला.

मुलीच्या घरच्यांच्या लक्षात हा प्रकार येताच संताप व्यक्त करण्यात आला. घटनेची माहिती पोलिसांना देण्यात आली.
पोलिसांनी तत्काळ कारवाई करत संबंधित तरुणाला ताब्यात घेतले. मुलीच्या तक्रारीनंतर
पोक्सो कायद्यांतर्गत गुन्हा दाखल करण्यात आला.

‘मी फक्त इमोजी पाठवला, काही चुकीचे केले नाही,’ असे सांगणाऱ्या त्या तरुणाला मात्र थेट कारागृहात पाठवण्यात आले.
ही घटना सोशल मीडियावरील निष्काळजी वर्तन किती महागात पडू शकते, याचे जिवंत उदाहरण ठरली आहे.

आज प्रत्येकाच्या हातात मोबाइल आहे. पण कोणाशी संवाद साधायचा, कुठे थांबायचे आणि काय पाठवायचे याचे भान नसेल,
तर एक छोटासा मेसेज किंवा इमोजीसुद्धा गुन्हा ठरू शकतो.
ही घटना फक्त एका घरापुरती नसून, संपूर्ण तरुणाईसाठी गंभीर इशारा आहे.