चाकू हल्ल्याने धाड हादरले! दोन जणांवर वार करणाऱ्या आरोपीला तात्काळ अटक; न्यायालयाकडून 2 दिवसांची पोलीस कोठडी

बुलडाणा : भागवत गायकवाड 

बुलढाणा जिल्ह्यातील धाड पोलीस स्टेशन हद्दीत चाकू हल्ल्याची गंभीर घटना घडली आहे. चांडोळ येथील खोजी मोहल्ल्यात 24 ऑगस्ट 2026 रोजी रात्री साडेनऊच्या सुमारास दोन व्यक्तींवर चाकूने वार करण्यात आले. या हल्ल्यात दोघे जखमी झाले असून, धाड पोलिसांनी तत्काळ कारवाई करत आरोपीला अटक केली आहे. आरोपीला न्यायालयासमोर हजर केले असता न्यायालयाने दोन दिवसांची पोलीस कस्टडी रिमांड मंजूर केली.

या प्रकरणी फिर्यादी शेख जुमान शेख जकाउल्ला (वय 30, रा. खोजी मोहल्ला, चांडोळ) यांनी दिलेल्या फिर्यादीवरून धाड पोलीस स्टेशनमध्ये कायमी गुन्हा क्रमांक 352/2026 नुसार BNS कलम 109(1), 352 आणि 351(2) अंतर्गत गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी शेख जुमान आणि त्यांचा भाचा सोहिल खान शफिक खान हे घरासमोर बसलेले असताना आरोपी शेख रइस शेख युनूस तेथे आला. अश्लील फोटो पाठविल्याच्या कारणावरून आरोपीचा फिर्यादीसोबत वाद झाला.

वाद वाढल्यानंतर आरोपीने जवळील चाकूने फिर्यादीच्या उजव्या बाजूच्या पोटावर वार केल्याचे फिर्यादीच्या जबाबात नमूद आहे. त्यावेळी सोहिल खान हा फिर्यादीला सोडविण्यासाठी पुढे आला असता आरोपीने त्याच्याही उजव्या बाजूच्या पोटावर चाकूने वार केल्याचे पोलिसांनी सांगितले.

या हल्ल्यात दोघेही जखमी झाले. तसेच आरोपीने शिवीगाळ करून जीवे मारण्याची धमकी दिल्याचे फिर्यादीच्या जबाबावरून निष्पन्न झाल्याचे पोलिसांनी नमूद केले आहे.

घटनेची माहिती मिळताच धाड पोलिसांनी तात्काळ दखल घेत गुन्हा दाखल केला आणि आरोपीला अटक केली. त्यानंतर आरोपीला न्यायालयासमोर हजर करण्यात आले. न्यायालयाने आरोपीला दोन दिवसांची पोलीस कस्टडी रिमांड मंजूर केली आहे.

या गुन्ह्याचा सखोल तपास PSI नितीनसिंह चौहान करीत आहेत. या घटनेत आणखी कोणाचा सहभाग आहे का, तसेच हल्ल्यामागील इतर बाबींचा तपास पोलीस करीत आहेत. तपासातून निष्पन्न होणाऱ्या बाबींनुसार पुढील कायदेशीर कारवाई करण्यात येणार आहे.

घटनेचे गांभीर्य लक्षात घेऊन स.पो.नि. अजिनाथ मोरे, धाड पोलीस स्टेशन तसेच फॉरेन्सिक टीमने घटनास्थळी भेट देऊन पाहणी केली. घटनास्थळावरून आवश्यक पुरावे गोळा करण्यात आले आहेत.

धाड पोलिसांनी नागरिकांना कायद्याचे पालन करून शांतता व सुव्यवस्था अबाधित ठेवण्यासाठी पोलिसांना सहकार्य करण्याचे आवाहन केले आहे. कायदा व सुव्यवस्था बिघडविण्याचा प्रयत्न करणाऱ्यांविरुद्ध कायद्यानुसार कठोर कारवाई करण्यात येईल, असे पोलिसांनी स्पष्ट केले आहे.

टीप: या बातमीतील माहिती धाड पोलीस स्टेशनकडून जारी करण्यात आलेल्या प्रेस नोटवर आधारित आहे. प्रकरणाचा तपास सुरू असून तपासातून पुढील माहिती समोर येऊ शकते.