पिंपळगाव राजा/प्रतिनिधी

Accident news : पिंपळगाव राजा–भालेगाव बाजार मार्गावर 13 नोव्हेंबर रोजी दुपारी झालेल्या भीषण अपघातात दुचाकीवरील वडील आणि मुलाचा मृत्यू झाला असून तिघे गंभीर जखमी झाले आहेत. भरधाव ट्रकने दुचाकीला दिलेल्या धडकेत ही घटना घडली.

कवडगाव येथील गणेश शेषराव जाधव (35) हे MH-28 AL-3745 या दुचाकीवरून पिंपळगाव राजा येथून घरी परतत होते. सोबत पत्नी सपना जाधव (30), मुलगा आर्यन (10), अरुण (4) आणि सात महिन्यांचा रुद्र होते. ते भालेगाव बाजारमार्गे जात असताना RJ-11 GA-7002 क्रमांकाच्या ट्रकने दुचाकीला जोरदार धडक दिली.

अपघातात गणेश जाधव यांचा जागीच मृत्यू झाला. तर सर्व जखमींना खामगाव येथील रुग्णालयात दाखल करण्यात आले. उपचारादरम्यान आर्यन जाधव (10) यालाही मृत घोषित करण्यात आले.

चालक फरार — पोलिसांकडून गुन्हा दाखल

अपघातानंतर ट्रकचालक घटनास्थळावरून फरार झाला. पोलिसांनी ट्रक ताब्यात घेतला असून तक्रारीवरून चालकाविरुद्ध कलम 106(1), 281, 342(4), 125 क, 125 ख बीएसएन 2023 तसेच मोटार वाहन अधिनियम 184, 134(a), 187 अंतर्गत गुन्हा नोंदवला आहे.

अंत्यसंस्कार

मृत पिता-पुत्रावर कवडगाव येथे शुक्रवारी दुपारी तीन वाजता अंत्यसंस्कार करण्यात आले.