सिंदखेड राजा–देऊळगाव राजा शहरांसाठी मोठी मागणी; आमदार मनोज कायंदेंनी विधानसभेत निधीसाठी आवाज उठवला.

दोन्ही शहरांमध्ये लोकसंख्या झपाट्याने वाढत असून त्यामानाने नागरी सुविधा अपुऱ्या पडत असल्याचे त्यांनी सभागृहाच्या निदर्शनास आणून दिले. विशेषतः अर्धवट अवस्थेतील भूमिगत गटार योजना आणि अपूर्ण पायाभूत सुविधा यामुळे नागरिकांना मोठ्या त्रासाला सामोरे जावे लागत आहे. सांडपाण्याची योग्य विल्हेवाट न लागल्याने दुर्गंधी पसरत असून आरोग्याचा प्रश्नही गंभीर बनत चालल्याचे आमदार कायंदे यांनी स्पष्ट केले.

👉 विशेष जाहिरात | अधिक माहितीसाठी क्लिक करा

शहर स्वच्छ, सुंदर आणि आरोग्यदायी ठेवण्यासाठी केवळ तात्पुरत्या उपाययोजना पुरेशा नसून अद्ययावत व दीर्घकालीन विकास आराखडा आवश्यक असल्याचे मत त्यांनी मांडले. शहरांतर्गत चांगल्या दर्जाचे रस्ते, आधुनिक गटार व्यवस्था, नागरिकांसाठी सुसज्ज क्रीडांगणे, जॉगिंग ट्रॅक आणि सार्वजनिक सोयी-सुविधा उपलब्ध करून देण्याची गरज असल्याचे त्यांनी सांगितले.

तसेच, मागील काही वर्षांपासून रखडलेली विकासकामे पूर्ण करण्यासाठी अतिरिक्त निधी मंजूर करावा, अशी ठाम मागणी आमदार मनोज कायंदे यांनी शासन दरबारी लावून धरली. सिंदखेड राजा आणि देऊळगाव राजा ही शहरे केवळ निवासासाठी नव्हे, तर नागरिकांना अभिमान वाटावा अशी आदर्श शहरे बनवण्याची जबाबदारी सरकारची असल्याचेही त्यांनी नमूद केले.

आमदार कायंदे यांच्या या मागणीमुळे दोन्ही शहरांतील विकासकामांना गती मिळण्याची अपेक्षा नागरिकांकडून व्यक्त केली जात असून, शासन यावर कोणता निर्णय घेते याकडे सर्वांचे लक्ष लागले आहे.