बुलढाणा |२३ मार्च २०२६
जिल्ह्यात बोगस दिव्यांग प्रमाणपत्रांच्या पडताळणीत मोठा गैरप्रकार उघडकीस आला असून, जिल्हा परिषद प्रशासनाने कठोर भूमिका घेत १५ कर्मचाऱ्यांना निलंबित केले आहे. या कारवाईमुळे संपूर्ण जिल्हा परिषद वर्तुळात एकच खळबळ उडाली आहे.
मुख्य कार्यकारी अधिकारी गुलाबराव खरात यांच्या नेतृत्वाखाली ही मोहीम राबविण्यात आली. राज्य शासनाच्या निर्देशानुसार दिव्यांग व्यक्ती हक्क अधिनियम २०१६ अंतर्गत युनिक डिसॅबिलिटी आयडी (UDID) कार्ड पडताळणी सुरू करण्यात आली होती.
बोगस दिव्यांग प्रमाणपत्रांच्या तपासणीदरम्यान अनेक कर्मचाऱ्यांकडे आवश्यक कागदपत्रांचा अभाव आढळून आला. काही प्रकरणांमध्ये प्रमाणपत्रांबाबत गंभीर संशय निर्माण झाला. संबंधित १५ कर्मचाऱ्यांना १२ मार्च रोजी मूळ कागदपत्रांसह उपस्थित राहण्याचे आदेश देण्यात आले होते; मात्र वारंवार संधी देऊनही ते अनुपस्थित राहिल्याने निलंबनाची कारवाई करण्यात आली.
निलंबित करण्यात आलेल्यांमध्ये १२ शिक्षक, २ ग्रामसेवक आणि १ परिचर यांचा समावेश आहे. युनिक डिसॅबिलिटी आयडी कार्ड काढण्याची अंतिम मुदत जून २०२५ असूनही नियमांचे पालन न केल्याचे स्पष्ट झाले आहे.
दरम्यान, प्रशासनाकडून संबंधितांना वैद्यकीय मंडळामार्फत पुनर्पडताळणीची संधी देण्यात येणार आहे. चुकीची प्रमाणपत्रे स्वेच्छेने जमा केल्यास पुनर्नियुक्तीची शक्यता वर्तवली जात आहे. मात्र बोगस लाभ घेणाऱ्यांवर कठोर कारवाई होणार असल्याचे संकेत प्रशासनाने दिले आहेत.
पात्र दिव्यांगांना न्याय मिळावा आणि शासनाच्या योजनांचा गैरवापर थांबावा, हा या मोहिमेचा मुख्य उद्देश असल्याचे अधिकाऱ्यांनी स्पष्ट केले आहे.
कारवाईचा तपशील :
एकूण तपासणीतील कर्मचारी – ५५
निलंबित कर्मचारी – १५
शिक्षक – १२
ग्रामसेवक – २
परिचर – १
Related News
- चेक बाउन्स प्रकरणात कडक निकाल! आरोपीला 3 महिन्यांचा सश्रम कारावास; 2.80 लाखांचा दंड
- भेसळयुक्त खवा-पनीर विक्रेत्यांवर बुलढाण्यात मोठी कारवाई! जिल्हाधिकाऱ्यांचा कडक इशारा
- साखरखेर्डा हादरलं! कर्जबाजारी शेतकऱ्याची गळफास घेऊन आत्महत्या; अतिवृष्टीमुळे पिकांचे नुकसान ठरलं कारण?
👉 अधिक अपडेट्ससाठी Kattanews.in ला भेट देत रहा
