कावड यात्रा आणि ईद मिलाद शांततेत साजरे करा; साखरखेर्डा येथे पोलीस अधिकाऱ्यांचे नागरिकांना आवाहन

साखरखेर्डा, बुलढाणा : समाधान सरकटे 

आगामी कावड यात्रा आणि ईद मिलाद सण-उत्सवाच्या पार्श्वभूमीवर साखरखेर्डा येथे शांतता कमिटीची बैठक घेण्यात आली. दोन्ही सण उत्सव शांततेत आणि सलोख्याच्या वातावरणात पार पडावेत, यासाठी नागरिकांनी सजग राहावे तसेच कायदा हातात घेऊ नये, असे आवाहन उपविभागीय पोलीस अधिकारी संतोष खाडे यांनी केले.

साखरखेर्डा नगरीतून सोमवार, २४ ऑगस्ट रोजी कावड यात्रा निघणार आहे. या यात्रेसाठी निश्चित करण्यात आलेल्या मार्गावरूनच मिरवणूक काढावी, असे बैठकीत सांगण्यात आले. यात्रेदरम्यान कोणत्याही प्रकारची वादग्रस्त वक्तव्ये करू नयेत किंवा वाद निर्माण होईल अशी गाणी वाजवू नयेत, असे आवाहन पोलिस प्रशासनाने केले.

कोणाकडूनही अनुचित प्रकार घडवण्याचा प्रयत्न होत असल्यास नागरिकांनी स्वतः कायदा हातात न घेता तत्काळ पोलिसांना माहिती द्यावी. संबंधित प्रकाराची माहिती मिळाल्यानंतर नियमानुसार योग्य ती कारवाई करण्यात येईल, असे उपविभागीय पोलीस अधिकारी संतोष खाडे यांनी स्पष्ट केले.

प्रत्येक समाजातील नागरिकांनी सण-उत्सव साजरे करताना एकमेकांना सहकार्य करून सामाजिक सलोखा कायम ठेवावा, असेही त्यांनी सांगितले. साखरखेर्डा हे शांतता आणि सामाजिक एकोपा जपणारे गाव असून कावड यात्रा आणि ईद मिलाद शांततेत पार पडतील, असा विश्वास बैठकीत व्यक्त करण्यात आला.

यावेळी जिल्हा परिषदेचे माजी उपाध्यक्ष रामभाऊ जाधव यांनी ईद मिलादनिमित्त आयोजित करण्यात आलेल्या रक्तदान शिबिरात सर्वांनी सहभागी व्हावे, असे आवाहन केले. समाजातील सर्व घटकांनी एकत्र येऊन सण-उत्सव शांततेत साजरे करण्याची गरज असल्याचे त्यांनी नमूद केले.

बैठकीत माजी सैनिक अर्जुन गवई, भाजपा ओबीसी सेलचे जिल्हाध्यक्ष संतोष दसरे आणि अस्लम अंजूम यांनीही आपले विचार मांडले.

शांतता कमिटीच्या बैठकीला ठाणेदार युवराज रबडे, माजी सरपंच कमलाकर गवई, उल्हास देशपांडे, सुनील जगताप, गोपाल राजपूत, शुभम राजपूत, रामदाससिंग राजपूत, दिलीप बेंडमाळी, संदीप खिल्लारे, इब्राहिम शहा, माजी सरपंच दाऊद कुरेशी, अन्नसार कुरेशी, असलम शहा, आयुब कुरेशी यांच्यासह अनेक नागरिक उपस्थित होते.

कावड यात्रा आणि ईद मिलादच्या पार्श्वभूमीवर साखरखेर्ड्यात पोलिस प्रशासनाने शांतता आणि सामाजिक सलोखा राखण्याचे आवाहन केले असून, नागरिकांनी अफवा किंवा वादाला बळी न पडता प्रशासनाला सहकार्य करण्याचे आवाहन करण्यात आले आहे.