मेहकर | समाधान सरकटे
न्यायव्यवस्थेवर नागरिकांचा विश्वास असताना त्याच व्यवस्थेतील एका कर्मचाऱ्याला लाच घेताना अटक झाल्याने मेहकरमध्ये मोठी खळबळ उडाली आहे. जंगम मालमत्ता जप्तीचे न्यायालयीन वॉरंट बजावू नये, यासाठी 10 हजार रुपयांची लाच स्वीकारताना मेहकर येथील दिवाणी न्यायालयातील बेलिफ जगदीश सुखदेव राऊत (वय 31) याला लाचलुचपत प्रतिबंधक विभागाने (ACB) गुरुवारी बसस्थानक परिसरात रंगेहात पकडले.
📲 KattaNews WhatsApp Group
महाराष्ट्रातील ताज्या, विश्वासार्ह आणि सर्वात वेगवान बातम्या थेट मोबाईलवर मिळवण्यासाठी आमच्या WhatsApp ग्रुपमध्ये आजच सहभागी व्हा.
लाचलुचपत प्रतिबंधक विभागाने दिलेल्या माहितीनुसार, तक्रारदार (वय 53, व्यवसाय – शेती) यांच्या विरोधात मेहकर येथील दिवाणी न्यायालयात दिवाणी दावा प्रलंबित आहे. या प्रकरणात न्यायालयाने जंगम मालमत्ता जप्तीचे वॉरंट काढले होते. हे वॉरंट बजावू नये आणि न बजावताच परत करावे, यासाठी बेलिफ जगदीश राऊत यांनी सुरुवातीला 15 हजार रुपयांच्या लाचेची मागणी केल्याची तक्रार ACBकडे करण्यात आली होती.
तक्रारीनंतर 6 ऑगस्ट रोजी दुपारी न्यायालय परिसरात पडताळणी करण्यात आली. पडताळणीदरम्यान आरोपीने 15 हजार रुपयांची मागणी केल्याचे निष्पन्न झाले. त्यानंतर झालेल्या चर्चेत 10 हजार रुपयांवर तडजोड झाली. त्यानुसार ACBच्या पथकाने नियोजनबद्ध सापळा रचला.
गुरुवारी दुपारी 2.07 ते 2.12 या वेळेत मेहकर बसस्थानक परिसरात तक्रारदाराकडून 10 हजार रुपयांची लाच स्वीकारताच ACBच्या अधिकाऱ्यांनी बेलिफ जगदीश राऊत याला रंगेहात पकडले. या कारवाईमुळे न्यायालयीन वर्तुळात एकच खळबळ उडाली.
आरोपी जगदीश सुखदेव राऊत हा मेहकर येथील दिवाणी न्यायालय (वरिष्ठ स्तर) येथे बेलिफ म्हणून कार्यरत असून त्याचे मूळ गाव साखरखेर्डा (ता. सिंदखेड राजा, जि. बुलढाणा) येथील माळीपुरा आहे. या प्रकरणी मेहकर पोलीस ठाण्यात भ्रष्टाचार प्रतिबंधक अधिनियम, 1988 मधील कलम 7 अन्वये गुन्हा दाखल करण्याची प्रक्रिया सुरू होती.
ही कारवाई बुलढाणा ACBचे पोलीस निरीक्षक रमेश पवार यांच्या नेतृत्वाखाली करण्यात आली. पोलीस उपअधीक्षक भागोजी चोरमले यांनी पर्यवेक्षण केले. पथकात पोलीस कॉन्स्टेबल शैलेश सोनवणे, पंढरी शेळके आणि नितीन शेटे यांचा सहभाग होता. या कारवाईस अॅन्टी करप्शन ब्युरो, अमरावती परिक्षेत्राचे पोलीस अधीक्षक बापू बांगर यांचे मार्गदर्शन लाभले.
विशेष म्हणजे, यापूर्वी 28 फेब्रुवारी 2025 रोजी मेहकर न्यायालयातील सरकारी अधिवक्त्यालाही लाच स्वीकारताना अटक करण्यात आली होती. दीड वर्षाच्या कालावधीत न्यायालयाशी संबंधित दुसऱ्या अधिकाऱ्यावरही लाचखोरीची कारवाई झाल्याने नागरिकांमध्ये आश्चर्य व्यक्त होत आहे.
📢 तुमच्याकडेही अशी माहिती आहे का?
तुमच्या परिसरातील ताज्या घडामोडी, अपघात, गुन्हे, सरकारी योजना किंवा इतर महत्त्वाच्या बातम्या आमच्यापर्यंत पोहोचवा. तुमची माहिती गोपनीय ठेवली जाईल.
KattaNews.in – जनतेचा विश्वास, सत्याचा आवाज.
📰 संबंधित बातम्या
