लोणार सरोवर संकटात: कमळजा माता मंदिर वाचवण्यासाठी १००% लोणार बंद, व्यापाऱ्यांचा उत्स्फूर्त प्रतिसाद

मागील काही काळापासून लोणार सरोवराची पाणीपातळी सातत्याने वाढत असून मंदिर परिसर पूर्णतः जलमय होण्याच्या मार्गावर आहे. त्यामुळे केवळ धार्मिकच नव्हे तर ऐतिहासिक आणि पुरातत्वदृष्ट्या अमूल्य असलेल्या या वारशाचे मोठे नुकसान होण्याची भीती व्यक्त केली जात आहे.

आंदोलनकर्त्यांच्या मते, वाढत्या पाणीपातळीमुळे मंदिराचे होणारे नुकसान तातडीने थांबवणे अत्यावश्यक आहे. पुरातत्व विभागाने कायमस्वरूपी तांत्रिक उपाययोजना राबवाव्यात तसेच भविष्यात अशा प्रकारे वारसा स्थळांचे नुकसान होऊ नये यासाठी ठोस कृती आराखडा तयार करावा, अशी ठाम मागणी यावेळी करण्यात आली.

विशेष म्हणजे, या गंभीर विषयाबाबत १९ जानेवारी २०२६ रोजी तहसीलदार (तालुका दंड अधिकारी) यांना देखील लेखी स्वरूपात माहिती देण्यात आली होती. मात्र त्यानंतरही कोणतीही ठोस कारवाई न झाल्याने नागरिकांमध्ये तीव्र संताप व्यक्त होत आहे.

हा ‘लोणार बंद’ पूर्णतः शांततेच्या मार्गाने पाळण्यात आला. अत्यावश्यक सेवा जसे की दवाखाने आणि मेडिकल स्टोअर्स वगळण्यात आले होते. कायदा व सुव्यवस्थेचा प्रश्न निर्माण होऊ नये यासाठी पोलीस प्रशासनाने बंददरम्यान चोख बंदोबस्त ठेवला होता. दरम्यान, व्यापाऱ्यांनी स्वयंस्फूर्तीने आपली सर्व प्रतिष्ठाने बंद ठेवत या आंदोलनाला पाठिंबा दिला.

👉 ऐतिहासिक वारसा वाचवण्यासाठी प्रशासनाने तात्काळ पावले उचलावीत, अशी मागणी नागरिकांकडून होत आहे. अशाच महत्त्वाच्या स्थानिक व राज्यातील बातम्यांसाठी KattaNews.in सोबत जोडलेले रहा.