लोणार शहरात भरदिवसा धाडसी चोरी; चहा घेण्यासाठी हॉटेलमध्ये गेले अन् काही मिनिटांतच स्कॉर्पिओची काच फोडून साडेतीन लाखांची रोकड घेऊन चोरटे पसार

लोणार : विनायक कुटे

बुलढाणा क्राईम न्यूज (Buldhana Crime News) अंतर्गत लोणार शहरातील लोणी नाक्यावर भरदिवसा धाडसी चोरीची घटना घडल्याने परिसरात खळबळ उडाली आहे. चहा घेण्यासाठी हॉटेलमध्ये गेलेल्या कांदा बी व्यापाऱ्याची स्कॉर्पिओ काही मिनिटांतच चोरट्यांनी फोडली. वाहनाची काच फोडून चोरट्यांनी तब्बल साडेतीन लाख रुपयांची रोकड आणि महत्त्वाची कागदपत्रे असलेली बॅग लंपास केली. ही घटना गुरुवारी, २० ऑगस्ट २०२६ रोजी सकाळी सुमारे १०.३० वाजता शेगाव-पंढरपूर राष्ट्रीय महामार्गावरील लोणी नाक्याजवळ घडली.

जालना येथील रहिवासी आणि सध्या केशव शिवनी येथे मुक्कामी असलेले कांदा बी व्यापारी दिलीप माधवराव खरले हे कांदा बी खरेदीसाठी पांगरा डोळे येथे आले होते. त्यानंतर ते लोणी नाक्याजवळील एका हॉटेलसमोर थांबले.

खरले यांनी त्यांची एमएच-२८ सीसी-५७५४ क्रमांकाची स्कॉर्पिओ लॉक करून चहा घेण्यासाठी हॉटेलमध्ये प्रवेश केला. हीच संधी साधत अज्ञात चोरट्याने वाहनाच्या चालकाच्या सीटमागील खिडकीवर दगड मारून काच फोडली.

यानंतर चोरट्याने गाडीत ठेवलेली साडेतीन लाख रुपयांची रोकड आणि महत्त्वाची कागदपत्रे असलेली बॅग बाहेर काढली. बाहेर दुचाकीवर थांबलेल्या साथीदाराच्या मदतीने दोघेही लोणी रोडच्या दिशेने पसार झाले.

काही वेळाने खरले वाहनाजवळ परत आले असता स्कॉर्पिओची काच फुटलेली आणि रोकड असलेली बॅग गायब असल्याचे त्यांच्या निदर्शनास आले. त्यांनी तातडीने पोलिसांना घटनेची माहिती दिली.

माहिती मिळताच पोलीस निरीक्षक प्रकाश सदगीर यांच्या मार्गदर्शनाखाली सहायक पोलीस निरीक्षक गजानन कौळासे, पोलीस उपनिरीक्षक राजेश घोगरे यांच्यासह पोलीस पथक घटनास्थळी दाखल झाले.

पोलिसांनी घटनास्थळाची पाहणी करून परिसरातील सीसीटीव्ही फुटेज तपासण्यास सुरुवात केली. चोरट्यांचा शोध घेण्यासाठी परिसरात नाकाबंदी करण्यात आली. मात्र, तोपर्यंत संशयित चोरटे पसार झाले होते.

दिलीप खरले यांच्या तक्रारीवरून लोणार पोलिसांनी अपराध क्रमांक ३४०/२०२६ नोंदवत भारतीय न्याय संहिता कलम ३०३(२) व ३२४(२) अन्वये अज्ञात आरोपींविरुद्ध गुन्हा दाखल केला आहे.

या प्रकरणाचा पुढील तपास पोलीस उपनिरीक्षक सोनाली गर्जे करीत आहेत. भरदिवसा आणि महामार्गालगत घडलेल्या या चोरीमुळे परिसरात चर्चेला उधाण आले असून, सीसीटीव्ही फुटेजच्या आधारे चोरट्यांचा शोध घेण्याचे पोलिसांसमोर आव्हान आहे.