दुसरबीड | सिंदखेडराजा
दुसरबीड येथे लोकनेते, बुलढाणा जिल्ह्याचे सहकार महर्षी, जिल्हा मध्यवर्ती सहकारी बँकेचे संस्थापक अध्यक्ष तसेच जिजामाता सहकारी साखर कारखान्याचे संस्थापक स्वर्गीय शंकरराव विठ्ठलराव उर्फ अण्णासाहेब देशमुख यांच्या जयंतीनिमित्त भावपूर्ण अभिवादन कार्यक्रम पार पडला.
या कार्यक्रमाचे आयोजन जिजामाता ग्रीन एनर्जी लिमिटेड साखर कारखान्याच्या परिसरात करण्यात आले होते.यावेळी स्व. अण्णासाहेब देशमुख यांच्या पूर्णाकृती पुतळ्यास हरिभाऊ राजे जाधव यांनी पुष्पहार अर्पण करून श्रद्धांजली वाहिली. त्यानंतर उत्तमराव देशमुख यांनीही पुष्पहार अर्पण करून लोकनेत्यांच्या स्मृतींना उजाळा दिला.
सहकार चळवळीच्या माध्यमातून शेतकरी, कष्टकरी आणि सर्वसामान्यांच्या सर्वांगीण विकासासाठी स्व. अण्णासाहेब देशमुख यांनी दिलेले योगदान अतुलनीय असल्याचे यावेळी उपस्थितांनी नमूद केले. त्यांच्या विचारांचा व सहकाराचा वारसा पुढील पिढीपर्यंत पोहोचवण्याचा संकल्प यावेळी व्यक्त करण्यात आला.
ज्येष्ठ पत्रकार व जिल्हा प्रतिनिधी प्रा. दिलीप नाईकवाड यांनी याप्रसंगी स्व. अण्णासाहेब देशमुख यांच्या सामाजिक, राजकीय व सहकार क्षेत्रातील जीवनकार्यावर सविस्तर प्रकाश टाकत उपस्थितांना प्रेरणादायी मार्गदर्शन केले.
संबंधित बातम्या :
