बुलढाणा | २३ जानेवारी २०२६
बुलढाणा जिल्ह्यात रेती माफियाची दहशत दिवसेंदिवस वाढत असून, शासकीय कर्मचाऱ्यांचे प्राणही धोक्यात आले आहेत. महिला तलाठीवर ट्रॅक्टर हल्ला करण्याचा धक्कादायक प्रकार मंगळवार, २० जानेवारी रोजी बुलढाणा तालुक्यातील रायपूर येथे घडला. अवैध रेती वाहतुकीवर कारवाई करत असताना ट्रॅक्टर चालकाने ग्राम महसूल अधिकारी उषा संतोष देशमुख व त्यांच्या सहकारी भाग्यशाली गजेंद्र गिरी यांच्या अंगावर थेट ट्रॅक्टर घालण्याचा प्रयत्न केला.
ही घटना दुपारी साडेबारा वाजण्याच्या सुमारास घडली. रायपूर येथील तलाठी कार्यालयाजवळ विना नंबरचा निळ्या रंगाचा न्यू हॉलंड ३६०० कंपनीचा ट्रॅक्टर रेतीने भरलेला जात असल्याचे दिसताच महसूल विभागाच्या कर्मचाऱ्यांनी संशयावरून ट्रॅक्टर थांबवण्याचा प्रयत्न केला. मात्र चालकाने वाहन न थांबवता थेट महिला तलाठीच्या अंगावर ट्रॅक्टर नेऊन घटनास्थळावरून पलायन केले.
या प्रकरणात ट्रॅक्टर चालकाचे नाव ज्ञानेश्वर मुरडकर (रा. रायपूर) असे असून, महसूल विभागाच्या तक्रारीवरून रायपूर पोलिसांनी गुन्हा दाखल केला आहे. पोलिसांनी ट्रॅक्टर जप्त करून त्यातील १ ब्रास रेती (किंमत ३ हजार रुपये) व ट्रॅक्टर (किंमत अंदाजे ३ लाख रुपये) असा एकूण ३ लाख ३ हजार रुपयांचा मुद्देमाल जप्त केला आहे.
या घटनेमुळे बुलढाणा जिल्ह्यातील महिला कर्मचाऱ्यांच्या सुरक्षेचा गंभीर प्रश्न निर्माण झाला आहे. कर्तव्य बजावत असताना महिला अधिकाऱ्यांवर जीवघेणे हल्ले होत असतील, तर महिला सुरक्षित आहेत का? असा संतप्त सवाल महसूल व पटवारी संघटनांकडून उपस्थित केला जात आहे.
या प्रकरणी रायपूर पोलिसांनी भारतीय न्याय संहिता २०२३ अंतर्गत कलम २२१, ३०३(२) तसेच महाराष्ट्र जमीन महसूल अधिनियम १९६६ चे कलम ४८ अन्वये गुन्हा दाखल केला आहे. मात्र अद्याप आरोपी चालकाला अटक न झाल्याने संताप व्यक्त केला जात आहे.
हे पण वाचा..
सिंदखेडराजा पंचायत समितीतील अनागोंदी कारभार चव्हाट्यावर; कर्मचारी कार्यालयाऐवजी बाहेरच अधिक दिसतात!
पटवारी संघटनेचे जिल्हाध्यक्ष गोपाळ राजपूत यांनी स्पष्ट इशारा दिला असून, आरोपीला तात्काळ अटक न झाल्यास जिल्हाभर तीव्र आंदोलन छेडण्यात येईल, असे त्यांनी सांगितले.
तुमचं मत काय? महिला शासकीय कर्मचाऱ्यांच्या सुरक्षेसाठी कठोर कायदे आणि तातडीची अटक आवश्यक आहे का? तुमचं मत खाली कमेंटमध्ये नक्की कळवा.
