बकरी गिळणारा महाकाय अजगर मृतावस्थेत; हनवतखेडच्या शिवारात खळबळ, दुसरा अजगर असल्याने शेतकऱ्यांत भीती

नागपंचमीच्या सणाचा उत्सव सुरू असतानाच हनवतखेड परिसरातील मांगीर बाबा मंदिराजवळील तलावाच्या काठच्या शिवारात थरारक घटना समोर आली आहे. शेळ्या चारण्यासाठी गेलेल्या शेतकऱ्याच्या बकरीवर महाकाय अजगराने झडप घालून तिला अख्खी गिळल्याने परिसरात खळबळ उडाली.

या घटनेमुळे शेतकरी आणि नागरिकांमध्ये भीतीचे वातावरण निर्माण झाले होते. मात्र, या घटनेनंतर दुसऱ्याच दिवशी बकरी गिळणारा तोच अजगर शिवारात मृतावस्थेत आढळून आला. अजगर मृतावस्थेत असल्याची माहिती परिसरात पसरताच घटनास्थळी पाहण्यासाठी गावकऱ्यांनी मोठी गर्दी केली.

मृत अजगराचे पोट फुगलेले दिसत असल्याने त्याने बकरी गिळल्याचे स्पष्ट झाले. स्थानिकांच्या मदतीने अजगराच्या पोटातून गिळलेली बकरी बाहेर काढण्यात आली. हा प्रकार पाहून घटनास्थळी उपस्थित नागरिकांमध्ये भीतीचे वातावरण निर्माण झाले.

दरम्यान, मांगीर बाबा मंदिर परिसरातील तलावाकाठच्या शिवारात आणखी एक महाकाय अजगर फिरत असल्याचा दावा स्थानिक शेतकऱ्यांनी केला आहे. त्यामुळे शेतात काम करणारे शेतकरी, शेतमजूर आणि परिसरातील नागरिकांच्या सुरक्षेचा प्रश्न निर्माण झाला आहे.

अजगर पुन्हा आढळल्यास काय करायचे, अशी चिंता शेतकऱ्यांना सतावत आहे. त्यामुळे वनविभागाने या परिसरात तातडीने कॉम्बिंग ऑपरेशन राबवून दुसऱ्या अजगराचा शोध घ्यावा, अशी मागणी स्थानिकांकडून करण्यात येत आहे.

घटनेची माहिती मिळताच वनपरिक्षेत्र अधिकारी उमेश गायकवाड यांनी वनविभागाच्या पथकासह घटनास्थळी भेट देऊन पाहणी केली. वनविभागाकडून घटनेचा रीतसर पंचनामा करण्यात आला आहे.

मृत अजगराचे शवविच्छेदन करण्यात येणार असल्याची माहिती वनपरिक्षेत्र अधिकारी उमेश गायकवाड यांनी दिली. शवविच्छेदनानंतर अजगराच्या मृत्यूचे नेमके कारण स्पष्ट होण्याची शक्यता आहे.

दरम्यान, परिसरात दुसरा अजगर असल्याचा दावा होत असल्याने वनविभागाने तातडीने त्याचा शोध घेऊन नागरिकांच्या सुरक्षेसाठी आवश्यक उपाययोजना कराव्यात, अशी मागणी जोर धरत आहे.

टीप : अजगराच्या मृत्यूचे नेमके कारण शवविच्छेदनानंतर स्पष्ट होणार असून, दुसरा अजगर असल्याचा दावा स्थानिक शेतकऱ्यांनी केला आहे.