जिच्या कुशीत वाढला, तिच्याच डोक्यात घातली वीट! पाच हजारांसाठी मुलाचा आईवर हल्ला; देऊळगाव राजात गुन्हा दाखल

देऊळगाव राजा : मनोहर खंदारे 

जिच्या कुशीत वाढला, त्याच आईवर पाच हजार रुपयांसाठी मुलाने हल्ला केल्याची धक्कादायक घटना देऊळगाव राजा परिसरातील पिंपळगाव चिलमखा शिवारात घडली. खर्चासाठी मागितलेले पाच हजार रुपये देण्यास असमर्थता दर्शविल्याने मुलाने आईला शिवीगाळ करून तिच्या डोक्यात वीट मारल्याचा आरोप आहे. या हल्ल्यात महिला जखमी झाली असून, तिच्या तक्रारीवरून देऊळगाव राजा पोलिसांनी मुलाविरुद्ध गुन्हा दाखल केला आहे.

पोलिसांच्या माहितीनुसार, कंगना लखन भोसले (रा. संजयनगर, देऊळगाव राजा) आणि रोहन लखन भोसले हे आई-मुलगा आहेत. कंगना भोसले यांनी दिलेल्या तक्रारीनुसार, ११ ऑगस्ट रोजी सायंकाळी पाचच्या सुमारास पिंपळगाव चिलमखा शिवारात रोहनने त्यांच्याकडे खर्चासाठी पाच हजार रुपयांची मागणी केली.

मात्र, आपल्याजवळ पैसे नसल्याचे कंगना यांनी सांगितल्यानंतर रोहनने त्यांना शिवीगाळ केल्याचा आरोप आहे. त्यानंतर तेथे पडलेली वीट उचलून त्यांच्या डोक्यात मारल्याचे तक्रारीत नमूद करण्यात आले आहे.

या हल्ल्यात कंगना भोसले यांच्या डोक्याला दुखापत होऊन रक्तस्राव झाला. घटनेनंतर त्यांनी पोलिसांकडे तक्रार केली. त्यांच्या तोंडी तक्रारीसह वैद्यकीय प्रमाणपत्राच्या आधारे देऊळगाव राजा पोलिस ठाण्यात मुलाविरुद्ध गुन्हा नोंदविण्यात आला.

पोलिस निरीक्षकांच्या आदेशानुसार हेडकॉन्स्टेबल संजय गोरे या प्रकरणाचा पुढील तपास करीत आहेत. दरम्यान, तक्रारीतील आरोपांची सत्यता पोलिस तपास आणि पुढील न्यायालयीन प्रक्रियेत निश्चित होणार आहे.

टीप : या वृत्तातील माहिती पोलिस तक्रार आणि उपलब्ध प्राथमिक माहितीनुसार आहे. तक्रारीतील आरोपांची अंतिम सत्यता पोलिस तपास आणि न्यायालयीन प्रक्रियेनंतर निश्चित होईल.