अवैध रेती उत्खनन आणि वाहतुकीविरोधात महसूल प्रशासनाने कारवाईचा धडाका सुरूच ठेवला आहे. सिनगाव जहांगीर येथे पहाटेच्या सुमारास चोरट्या मार्गाने रेती वाहतूक करणाऱ्या दोन टिप्परवर महसूल पथकाने धडक कारवाई केली. १० ऑगस्ट रोजी पहाटे ३ वाजता झालेल्या या कारवाईत दोन्ही टिप्परमध्ये प्रत्येकी ३ ब्रास रेती आढळून आली. त्यानंतर दोन्ही टिप्पर जप्त करण्यात आले.
तहसीलदार वैशाली डोंगरजाळ यांच्या मार्गदर्शनाखाली गेल्या काही दिवसांपासून अवैध रेती वाहतूक करणाऱ्यांविरोधात महसूल प्रशासनाकडून कारवाई सुरू आहे. प्रशासनाच्या कारवाईपासून बचाव करण्यासाठी रात्रीच्या वेळी रेती वाहतूक करण्याचा प्रयत्न सुरू असतानाच महसूल पथकाने पहाटेच्या वेळी ही कारवाई केली.
कारवाईदरम्यान दोन्ही टिप्परमध्ये एकूण ६ ब्रास रेती आढळून आली. जप्त करण्यात आलेले दोन्ही टिप्पर पुढील दंडात्मक कारवाईसाठी देऊळगाव राजा पोलिसांच्या ताब्यात देण्यात आले आहेत.
ही कारवाई ग्राम महसूल अधिकारी आकाश खरात, परमेश्वर बुरकुल, बबन काकड आणि महसूल सेवक विठ्ठल हरणे यांच्या पथकाने केली.
गेल्या काही दिवसांपासून अवैध रेती वाहतूक करणाऱ्यांविरोधात सातत्याने कारवाया होत असल्याने संबंधितांमध्ये खळबळ उडाली आहे. पहाटेच्या वेळी करण्यात आलेल्या या कारवाईमुळे महसूल प्रशासनाची नजर अवैध रेती वाहतुकीवर असल्याचे स्पष्ट झाले आहे.
अवैध रेती उत्खनन आणि वाहतुकीला आळा घालण्यासाठी महसूल प्रशासनाकडून पुढील काळातही कारवाई सुरू राहण्याची शक्यता आहे.
- बुलढाणा जिल्ह्यातील ताज्या बातम्या
- महसूल प्रशासनाच्या महत्त्वाच्या कारवाया
- अवैध रेती वाहतुकीविरोधातील कारवाई
