रिपब्लिकन सेनेत मोठ्या नियुक्त्या; संघपाल पनाड जिल्हाध्यक्ष, दिपक अंभोरे तालुकाध्यक्ष

रिपब्लिकन सेनेत संघटनात्मक पातळीवर महत्त्वाच्या नियुक्त्या करण्यात आल्या आहेत. रिपब्लिकन सेनेचे राष्ट्रीय सरसेनानी मा. आनंदराज आंबेडकर यांच्या आदेशानुसार नागवंशी संघपाल पनाड यांची रिपब्लिकन सेना युवक आघाडीच्या बुलढाणा जिल्हाध्यक्षपदी नियुक्ती करण्यात आली आहे. तर दिपक अंभोरे यांची लोणार तालुका अध्यक्षपदी नियुक्ती करण्यात आली आहे.

संघपाल पनाड यांच्या नियुक्तीचे पत्र रिपब्लिकन सेनेचे बुलढाणा जिल्हाध्यक्ष इंजि. विजय मोरे यांच्या हस्ते प्रदान करण्यात आले. या नियुक्तीमुळे बुलढाणा जिल्ह्यातील युवक आघाडीच्या संघटनात्मक कामाला अधिक बळ मिळण्याची अपेक्षा व्यक्त केली जात आहे.

पक्ष संघटना अधिक मजबूत करणे, युवकांना संघटित करणे आणि रिपब्लिकन सेनेची विचारधारा सर्वसामान्यांपर्यंत पोहोचविण्यासाठी काम करण्याची जबाबदारी संघपाल पनाड यांच्यावर सोपविण्यात आली आहे. तसेच सामाजिक आणि संघटनात्मक उपक्रम अधिक प्रभावीपणे राबविण्यावरही त्यांचा भर राहणार आहे.

दरम्यान, दिपक अंभोरे यांची लोणार तालुका अध्यक्षपदी नियुक्ती झाल्याने लोणार तालुक्यातील रिपब्लिकन सेनेच्या संघटनात्मक कामकाजालाही नवे नेतृत्व मिळाले आहे. आगामी काळात तालुक्यात पक्षाची संघटना अधिक मजबूत करण्यासाठी त्यांच्या भूमिकेकडे लक्ष राहणार आहे.

या नियुक्त्यांबद्दल सामाजिक आणि राजकीय क्षेत्रातील मान्यवरांसह रिपब्लिकन सेनेचे पदाधिकारी व कार्यकर्त्यांनी संघपाल पनाड आणि दिपक अंभोरे यांचे अभिनंदन केले. तसेच त्यांच्या पुढील कार्यासाठी शुभेच्छा दिल्या.