मेहकर हादरले! ‘आज माझे दुकान… उद्या कोणाचे?’ एका रात्रीत ज्वेलर्ससह मेडिकल स्टोअर फोडले; व्यापाऱ्यांची उडाली झोप

मेहकर : विनायक कुटे 

शहरातील व्यापाऱ्यांमध्ये भीतीचे वातावरण निर्माण करणारी घटना समोर आली आहे. मेहकर शहरात एका रात्रीत दोन ठिकाणी धाडसी चोरी झाल्याने खळबळ उडाली आहे. जुन्या तहसील चौकातील श्रीकृष्ण ज्वेलर्सचे दुकान आणि विठ्ठल नगर येथील न्यू गजानन मेडिकल स्टोअर चोरट्यांनी फोडले. सकाळी दुकान उघडण्यासाठी आलेल्या व्यापाऱ्यांना चोरी झाल्याचे लक्षात येताच मोठा धक्का बसला.

प्राप्त माहितीनुसार, ६ ऑगस्ट २०२६ रोजी सकाळी ही चोरीची घटना उघडकीस आली. मेहकर येथील जुन्या तहसील चौक परिसरातील श्रीकृष्ण ज्वेलर्स या सराफी दुकानाचे चॅनल गेटचे लॉक तोडून अज्ञात चोरट्यांनी दुकानात प्रवेश केला.

चोरट्यांनी दुकानाचे शटरचे दोन्ही बाजूचे लॉक तोडले आणि सेंटर लॉक वर उचलून दुकानात प्रवेश केला. त्यानंतर काउंटरमध्ये ठेवलेल्या सुमारे ३५० ग्रॅम वजनाच्या चांदीच्या तोरड्या तसेच व्हिजन कंपनीचा डीव्हीआर असा एकूण सुमारे ४२ हजार रुपयांचा मुद्देमाल चोरून नेला.

याच रात्री विठ्ठल नगर परिसरातील न्यू गजानन मेडिकल स्टोअरलाही चोरट्यांनी लक्ष्य केले. दुकानाचे शटर फोडून ड्रॉवरमध्ये ठेवलेली अंदाजे ४ हजार रुपयांची रोख रक्कम लंपास करण्यात आली.

या घटनेनंतर व्यापाऱ्यांमध्ये संताप आणि भीतीचे वातावरण आहे. “आज माझे दुकान… उद्या कोणाचे?” अशी चिंता आता व्यापाऱ्यांकडून व्यक्त केली जात आहे. गजबजलेल्या तहसील चौक परिसरात आणि पोलिस स्टेशनपासून काही अंतरावरच चोरी झाल्याने शहरातील सुरक्षा व्यवस्थेवर प्रश्न उपस्थित होत आहेत.

घटनेची माहिती मिळताच मेहकर पोलिसांनी घटनास्थळी भेट देऊन तपास सुरू केला. फिर्यादी चंद्रशेखर वसंतराव काटकर (वय ४७, रा. रामनगर) यांच्या तक्रारीवरून अज्ञात चोरट्यांविरुद्ध गुन्हा दाखल करण्यात आला आहे.

फिंगरप्रिंट तज्ज्ञांनी घटनास्थळी भेट देऊन पुरावे संकलित केले आहेत. पुढील तपास बीट सफौ राजेंद्र काळे करीत आहेत. चोरी गेलेला मुद्देमाल आणि झालेल्या नुकसानीची रक्कम अधिक असल्याची माहिती दुकान मालकांनी दिली असून पोलिस तपासानंतर याबाबत अधिक माहिती समोर येणार आहे.

📌 संबंधित बातम्या

• न्याय देणाऱ्यांच्या दारातच भ्रष्टाचार! मेहकर न्यायालयात खळबळ; वॉरंट थांबवण्यासाठी बेलिफ 10 हजारांची लाच घेताना ACBच्या जाळ्यात
• देवीसमोर हात जोडले, नंतर त्याच गाभाऱ्यात चोरी केली! मर्दडीच्या जागृत देवस्थानातील धक्कादायक प्रकार CCTV मध्ये कैद
• राष्ट्रपतींच्या मंजुरीनंतर महाराष्ट्रात धर्मस्वातंत्र्य कायदा लागू; बळजबरीच्या धर्मांतरावर 7 वर्षांपर्यंत शिक्षा, जाणून घ्या काय आहेत नव्या तरतुदी