देऊळगाव राजा | समाधान सरकटे
जम्मू-काश्मीरमध्ये देशसेवा बजावत असताना सर्वोच्च बलिदान देणारे भारतीय सैन्याचे जवान अंकुश महादेव मिसाळ यांना त्यांच्या मेहुणाराजा या जन्मगावी शासकीय इतमामात अखेरचा निरोप देण्यात आला. हजारो नागरिक, माजी सैनिक, लोकप्रतिनिधी, प्रशासकीय अधिकारी आणि विविध सामाजिक संघटनांच्या उपस्थितीत झालेल्या अंत्यसंस्काराने संपूर्ण परिसर भावूक झाला. एका बाजूला दुःखाचा महासागर तर दुसऱ्या बाजूला देशासाठी प्राण अर्पण करणाऱ्या वीरपुत्राचा अभिमान अशा भावना प्रत्येकाच्या चेहऱ्यावर स्पष्ट दिसत होत्या.
२९ जून रोजी सकाळी मेहुणाराजा येथे त्यांच्या पार्थिवावर संपूर्ण शासकीय इतमामात अंत्यसंस्कार करण्यात आले. भारतीय सैन्याच्या जवानांनी मानवंदना दिल्यानंतर उपस्थितांनी ‘भारत माता की जय’, ‘अंकुश मिसाळ अमर रहे’ अशा घोषणांनी वातावरण भारावून टाकले. अनेकांनी अश्रुपूर्ण डोळ्यांनी वीर जवानाला अखेरचा सलाम केला.
शहीद अंकुश मिसाळ यांच्या पश्चात आई, पत्नी, मुलगा रणवीर आणि मुलगी दिव्या असा परिवार आहे. वडिलांचे यापूर्वीच निधन झाले असून दोन बहिणी आहेत. मुलगी दिव्या इयत्ता सहावीत, तर मुलगा रणवीर इयत्ता पाचवीत शिक्षण घेत आहे. कुटुंबावर दुःखाचा डोंगर कोसळला असला तरी देशासाठी दिलेल्या त्यांच्या सर्वोच्च बलिदानाचा अभिमान प्रत्येकाच्या मनात कायम राहील, अशी भावना ग्रामस्थांनी व्यक्त केली.
अंत्ययात्रेदरम्यान परिसरातील नागरिकांनी स्वयंस्फूर्तीने सहभाग घेत वीरपुत्राला अखेरचा निरोप दिला. अनेकांनी हातात तिरंगा घेऊन श्रद्धांजली अर्पण केली. संपूर्ण परिसरात देशभक्तीचे वातावरण निर्माण झाले होते.
मेहुणाराजा गावाने आपल्या सुपुत्राच्या रूपाने देशासाठी दिलेले हे सर्वोच्च योगदान इतिहासात कायम स्मरणात राहील. शहीद अंकुश मिसाळ यांचे बलिदान भावी पिढ्यांसाठी प्रेरणादायी ठरेल, अशा भावना उपस्थितांनी व्यक्त करत वीर जवानाला अश्रुपूर्ण श्रद्धांजली अर्पण केली.
📌 KattaNews.in वाचकांसाठी
देश, राज्य, बुलढाणा जिल्हा, देऊळगाव राजा तालुका आणि परिसरातील सर्व ताज्या, विश्वासार्ह व वेगवान बातम्यांसाठी KattaNews.in नियमित भेट द्या. ही बातमी आपल्या मित्र-परिवारासोबत नक्की शेअर करा.
Related News
