साखरखेर्डा |समाधान सरकटे
बुलढाणा जिल्ह्यातील साखरखेर्डा परिसरात यंदा पावसाळ्याच्या सुरुवातीलाच भीषण जलसंकट निर्माण झाले आहे. सावंगी माळी एक व दोन प्रकल्पांसह अनेक लघू व मध्यम तलाव पूर्णपणे कोरडे पडले असून उर्वरित तलावांमधील पाणीसाठा मृतसाठ्यावर पोहोचला आहे. परिणामी परिसरातील 15 हून अधिक गावांवर पिण्याच्या पाण्याची गंभीर टंचाई निर्माण होण्याची शक्यता व्यक्त केली जात आहे. मुक्या जनावरांनाही पाण्यासाठी वणवण भटकावे लागत असल्याने शेतकरी व ग्रामस्थांमध्ये तीव्र चिंता व्यक्त होत आहे.
गायखेडी तलावावर अवलंबून असलेल्या राताळी आणि शिंदी गावांमध्येही परिस्थिती चिंताजनक बनली आहे. पाणीपुरवठा विहिरींमधील जलपातळी मोठ्या प्रमाणात घटल्याने दोन्ही गावांना आवश्यक प्रमाणात पाणी मिळत नसल्याची माहिती समोर आली आहे. येत्या काही दिवसांत या गावांमध्येही टंचाई अधिक तीव्र होण्याची शक्यता आहे.
सावंगी माळी एक आणि दोन हे परिसरातील महत्त्वाचे तलाव मे महिन्यातच पूर्णपणे कोरडे पडले. या तलावांमधून उमनगाव, पांग्रीकाटे, वडगाव माळी, सावंगी माळी आणि सावंगी वीर या गावांना पाणीपुरवठा केला जातो. मात्र तलावातील विहिरींनी तळ गाठल्याने या गावांमध्ये पिण्याच्या पाण्याचा प्रश्न गंभीर बनला आहे. त्याचबरोबर गुरेढोरे आणि जंगली प्राण्यांसाठीही पाण्याचा मोठा प्रश्न निर्माण झाला आहे.
राजेगाव तलावात सध्या केवळ मृतसाठा शिल्लक असून शेंदुर्जन, राजेगाव, लिंगा, सायाळा, बाळसमुद्र, गोरेगाव आणि जागदरी या गावांच्या पाणीपुरवठा योजना त्यावर अवलंबून आहेत. पाणीसाठा झपाट्याने कमी होत असल्याने या गावांनाही भीषण पाणीटंचाईचा सामना करावा लागू शकतो. दरम्यान, परिसरातील अनेक लहान पाझर तलाव यापूर्वीच पूर्णपणे कोरडे पडले आहेत.
शेतकरी आणि ग्रामस्थांनी महालक्ष्मी, गायखेडी, राजेगाव आणि सावंगी माळी तलावांमध्ये उरलेले पाणी तातडीने राखीव ठेवण्याची मागणी प्रशासनाकडे केली आहे. आगामी काळात पावसाला विलंब झाल्यास परिस्थिती आणखी गंभीर होण्याची भीती व्यक्त केली जात आहे.
स्थानिक नागरिकांचे म्हणणे आहे की, जलसंकटाची तीव्रता लक्षात घेऊन प्रशासनाने वेळेत उपाययोजना करणे आवश्यक आहे. अन्यथा ग्रामीण भागातील नागरिकांसह हजारो मुक्या जनावरांना मोठ्या अडचणींचा सामना करावा लागू शकतो.
📢 वाचकांसाठी आवाहन
आपल्या परिसरातील महत्त्वाच्या घडामोडी, समस्या, अपघात, सामाजिक उपक्रम किंवा ताज्या बातम्या आम्हाला पाठवा. आपली बातमी KattaNews.in वर प्रसिद्ध केली जाईल.
संबंधित बातम्या
