बुलडाणा|विशाल गवई
या घटनांनी पुन्हा एकदा राज्यातील कायदा-सुव्यवस्थेचा प्रश्न ऐरणीवर आणला आहे. खामगाव-अकोला रोडवरील के. के. पेट्रोल पंपावर कॅनमध्ये पेट्रोल न दिल्याच्या कारणावरून काही तरुणांनी थेट तलवार आणि कोयते घेऊन धडक दिली. पेट्रोल पंपावरील कर्मचाऱ्यांना शिवीगाळ करत लाथाबुक्क्यांनी मारहाण करण्यात आली. तसेच जीवे मारण्याच्या धमक्यांमुळे परिसरात मोठी भीतीचे वातावरण निर्माण झाले.
👉 विशेष जाहिरात | अधिक माहितीसाठी क्लिक करा
ही धक्कादायक घटना २१ मेच्या रात्री खामगाव-अकोला रोडवरील के. के. पेट्रोल पंपावर घडली. मिळालेल्या माहितीनुसार, अमोल जाधव आणि त्याच्यासोबत एक अनोळखी युवक पेट्रोल पंपावर आले होते. त्यांनी कॅनमध्ये पेट्रोल भरण्याची मागणी केली. मात्र पेट्रोलचा केवळ अत्यावश्यक साठा उपलब्ध असल्याने कॅनमध्ये पेट्रोल देता येणार नसल्याचे पेट्रोल पंप मॅनेजर सागर अवचार यांनी स्पष्ट केले.
याच कारणावरून आरोपी संतप्त झाले. सुरुवातीला त्यांनी पेट्रोल पंप कर्मचाऱ्यांसोबत वाद घालत अश्लील शिवीगाळ केली. त्यानंतर काही वेळातच अमोल जाधव, अक्षय जाधव, चेतन जाधव आणि आणखी एक अनोळखी इसम हे हातात तलवार आणि कोयते घेऊन पुन्हा पेट्रोल पंपावर आले. आरोपींनी दहशत माजवत कर्मचाऱ्यांना लाथाबुक्क्यांनी मारहाण केली. तसेच “जीव घेऊ” अशी धमकी दिल्याचे तक्रारीत नमूद करण्यात आले आहे.
या घटनेनंतर पेट्रोल पंप मॅनेजर सागर अवचार यांनी खामगाव ग्रामीण पोलिस ठाण्यात धाव घेत तक्रार दाखल केली. पोलिसांनी आरोपींविरोधात कलम ४/२५ आर्म ॲक्टसह भारतीय न्याय संहितेतील विविध गंभीर कलमान्वये गुन्हा नोंदविला आहे.
या प्रकरणाचा पुढील तपास खामगाव पोस्टेचे ठाणेदार यांच्या मार्गदर्शनाखाली पोहेकॉ किरण राऊत करीत आहेत. आरोपींच्या शोधासाठी पोलिसांकडून हालचाली सुरू करण्यात आल्या असून परिसरातील सीसीटीव्ही फुटेजही तपासण्यात येत असल्याची माहिती समोर आली आहे.
दरम्यान, या घटनेमुळे खामगाव परिसरात मोठी खळबळ उडाली असून पेट्रोल पंप कर्मचाऱ्यांमध्ये भीतीचे वातावरण निर्माण झाले आहे.
वाचा आणखी महत्त्वाच्या बातम्या
- २७० क्विंटल हरभरा घेऊन ट्रक गायब! बुलढाण्यात LCB ची मोठी कारवाई; ५ आरोपी जेरबंद, १८ लाखांचा मुद्देमाल जप्त
- वाळू माफियांविरोधात LIVE वार्तांकन करताना पत्रकाराला मारहाण? दोषींना अटक करा, नाहीतर आंदोलन — पत्रकार संघटनांचा अल्टिमेटम
- बुलढाण्यात रायपूर पोलिसांची मोठी कारवाई; 2 पिस्तूल, 94 काडतुसे आणि XUV500सह 7 लाखांचा मुद्देमाल जप्त
आपल्या भागातील बातमी आम्हाला पाठवा
आपल्या परिसरातील ताज्या घडामोडी, अपघात, सामाजिक, राजकीय किंवा गुन्हेगारी बातम्या आम्हाला पाठवण्यासाठी Kattanews.in शी संपर्क साधा. तुमची बातमी राज्यभर पोहोचवण्याचे व्यासपीठ.
