जळगाव जामोद (बुलढाणा) |७ एप्रिल २०२६
मानसिक छळ, धमक्या आणि समाजात होणाऱ्या बदनामीच्या भीतीमुळे एका २१ वर्षीय तरुणीने आत्महत्या केल्याची हृदयद्रावक घटना पळशी सुपो येथे उघडकीस आली आहे. या घटनेमुळे परिसरात मोठी खळबळ उडाली असून महिला सुरक्षेचा प्रश्न पुन्हा एकदा ऐरणीवर आला आहे.
मिळालेल्या माहितीनुसार, गावातीलच गौरव पुरुषोत्तम खंडाळे (वय २२) हा गेल्या काही दिवसांपासून संबंधित तरुणीला सतत त्रास देत होता. “माझ्याशीच लग्न कर, नाहीतर आपले फोटो तुझ्या होणाऱ्या नवऱ्याला पाठवेन,” अशी धमकी तो वारंवार देत होता. या धमक्यांमुळे तरुणी मानसिकदृष्ट्या खचली होती.
👉 विशेष जाहिरात | अधिक माहितीसाठी क्लिक करा
दरम्यान, आरोपीच्या या कृत्यांमुळे तरुणीचे ठरलेले लग्नही मोडले. शनिवारी (४ एप्रिल) सासरच्या मंडळींनी घरी येऊन लग्नाचा संबंध तोडल्याचे स्पष्ट केले. भरल्या घरातून लग्न मोडल्याने आणि सततच्या मानसिक छळामुळे तरुणी पूर्णपणे खचून गेली होती.
समाजात होणारी बदनामी आणि आरोपीकडून सुरू असलेला त्रास असह्य झाल्याने तिने राहत्या घरी गळफास घेऊन आपले जीवन संपवले. ऐन तारुण्यात एका मुलीने अशा प्रकारे आयुष्य संपवल्याने परिसरात हळहळ व्यक्त केली जात आहे.
या प्रकरणी मृतक तरुणीचे काका ज्ञानेश्वर शामराव कोकाटे (वय ४७) यांनी जळगाव जामोद पोलीस ठाण्यात तक्रार दाखल केली आहे. या तक्रारीवरून पोलिसांनी आरोपी गौरव खंडाळे याच्याविरुद्ध भारतीय न्याय संहिता (BNS) कलम १०८ आणि ३५१ (२) अंतर्गत गुन्हा दाखल केला आहे.
पुढील तपास ठाणेदार नितीन पाटील यांच्या मार्गदर्शनाखाली सुरू असून, आरोपीला लवकरच अटक होण्याची शक्यता व्यक्त केली जात आहे.
👉 Related News
- अॅसिडिटी वाटलं, पण ठरलं जीवघेणं! सर्पदंशाने विद्यार्थिनीचा मृत्यू
- मोठी कारवाई! मोताळा कॉटन मार्केटमध्ये १० किलो गांजा जप्त; २ लाखांचा मुद्देमाल हस्तगत
- देऊळगाव राजा मध्ये बनावट पोलिसांनी केली फसवणूक, शेतकऱ्याची नऊ ग्रॅम सोन्याची अंगठी लंपास
👉 तुमच्या परिसरातील ताज्या बातम्यांसाठी
Kattanews.in ला नियमित भेट द्या आणि आमचा WhatsApp ग्रुप जॉईन करा.
