ॲसिडिटी वाटलं, पण ठरलं जीवघेणं! लोणारमध्ये सर्पदंशाने B.Pharmacy शिकणाऱ्या १९ वर्षीय विद्यार्थिनीचा मृत्यू

प्राप्त माहितीनुसार, रवींद्र शेषराव सानप यांची मुलगी साक्षी ही आई-वडिलांसोबत रात्री झोपलेली असताना विषारी सापाने तिला चावा घेतला. मात्र, सकाळी उठल्यानंतर तिला घशात दुखत असल्याने ॲसिडिटीसारखा त्रास होत असल्याचे वाटले.

तत्काळ तिला लोणार येथील दवाखान्यात नेण्यात आले. मात्र उपचाराला प्रतिसाद मिळत नसल्याने आणि सर्पदंशाची लक्षणे स्पष्ट दिसू लागल्याने तिला पुढील उपचारासाठी मेहकर येथे हलवण्यात आले. दुर्दैवाने, रस्त्यातच तिचा मृत्यू झाला.

दरम्यान, संबंधित साप शेजाऱ्याच्या अंगणात आढळून आला. साक्षी ही सुलतानपूर येथील B.Pharmacy द्वितीय वर्षाची विद्यार्थिनी होती. तिच्या अचानक झालेल्या मृत्यूमुळे गावावर शोककळा पसरली असून सर्वत्र हळहळ व्यक्त होत आहे.

वैद्यकीय तपासणीनंतर शोकाकुल वातावरणात तिच्यावर अंत्यसंस्कार करण्यात आले. तिच्या पश्चात आई-वडील, भाऊ-बहिण आणि मोठा आप्तपरिवार आहे.