किराणा दुकानाच्या जागेचा वाद चिघळला; थडमध्ये चौघांची तुफान हाणामारी, एकाची प्रकृती गंभीर

On: November 15, 2025 4:02 PM

धामणगाव बढे/प्रवीण गरुडे:

मोताळा तालुक्यातील थड येथे किराणा दुकानाच्या जागेच्या वादातून चौघांनी एकावर तुफान हाणामारी केल्याची धक्कादायक घटना उघडकीस आली आहे. या मारहाणीत प्रल्हाद रामलाल धनवटे (वय ५३) हे गंभीर जखमी झाले असून त्यांच्यावर छत्रपती संभाजीनगर येथील घाटी रुग्णालयात उपचार सुरु आहेत.

फिर्यादी मुक्ताबाई धनवटे यांच्या म्हणण्यानुसार गावातील किराणा दुकानाच्या जागेवरून काही दिवसांपासून वाद सुरू होता. १२ नोव्हेंबर रोजी रात्री आठच्या सुमारास विकास संतोष धनवटे व सागर संतोष धनवटे यांनी जागेच्या ताब्याविषयी प्रश्न उपस्थित करत प्रल्हाद धनवटे यांच्यावर दगडाने प्राणांतिक हल्ला केला.यावेळी विकास संतोष धनवटे व सुनिता संतोष धनवटे यांनी त्यांना खाली पाडून लाथांनी मारहाण केली. संतोष शामराव धनवटे यांनी “याला जिवंत सोडू नका” अशी धमकी दिल्याचे फिर्यादीत नमूद आहे.

या मारहाणीत प्रल्हाद धनवटे यांना गंभीर दुखापत झाल्याने त्यांना तातडीने छत्रपती संभाजीनगर येथे हलविण्यात आले. धामणगाव बढे पोलिसांनी तिघांना ताब्यात घेतले असून एका आरोपीचा शोध सुरु आहे. त्यांच्याविरुद्ध IJC कलम १०९, ११५ (२), ३५२, ३५१ (२)(३), ३ (५) अंतर्गत गुन्हा दाखल करण्यात आला आहे.

डीवायएसपींची घटनास्थळी पाहणी

घटनेच्या गांभीर्यामुळे बुलढाणा उपविभागीय पोलीस अधिकारी सुधीर पाटील यांनी थड येथे भेट देवून ग्रामस्थांशी चर्चा केली. यावेळी प्रभारी ठाणेदार बालाजी शेंगेपल्लू व पोलिस उपनिरीक्षक राहुल वरारकर उपस्थित होते.