चिखली | १ फेब्रुवारी २०२६
राष्ट्रीय स्वयंसेवक संघाच्या शताब्दी वर्षानिमित्त ठिकठिकाणी विशाल हिंदू संमेलनाचे आयोजन करण्यात येत असून, याच पार्श्वभूमीवर गणेश नगर जुने गाव परिसरातील सोमनाथ वस्ती येथे रविवार दि. २५ जानेवारी रोजी विशाल हिंदू संमेलन मोठ्या उत्साहात पार पडले.
सोमनाथ वस्ती येथे आयोजित विशाल हिंदू संमेलनास मोठ्या प्रमाणात नागरिकांची उपस्थिती
या संमेलनाला गणेश नगर व अंधारा महादेव परिसरातील नागरिकांनी मोठ्या संख्येने उपस्थिती लावत उस्फूर्त प्रतिसाद दिला. सामाजिक कार्यकर्ते महेश महाजन यांच्या अध्यक्षतेखाली हे संमेलन पार पडले.
यावेळी धर्मजागरण विभागाचे जिल्हा संयोजक सुहास जामदार यांनी प्रमुख मार्गदर्शन करत संघाच्या शताब्दी वर्षानिमित्त राबविण्यात येणाऱ्या ‘पंचपरिवर्तन’ संकल्पनेची माहिती दिली.
ह. भ. प. अशोक महाराज पवळ यांनी “धर्मो रक्षती रक्षितः” या विषयावर प्रभावी प्रवचन केले, तर सौ. राजश्री देशपांडे यांनी नारीशक्ती या विषयावर आपले विचार मांडले.
तत्पूर्वी जुना बुलढाणा रोड येथील श्री सोमनाथ मंदिरापासून भव्य दिंडी शोभायात्रेला सुरुवात झाली. टाळ-मृदंगाच्या गजरात वारकरी, महिला भजनी मंडळ व नागरिक मोठ्या संख्येने सहभागी झाले होते.
शोभायात्रेचे ठिकठिकाणी सडासंमार्जन, रांगोळ्या, केळीचे खांब व भगव्या पताकांनी स्वागत करण्यात आले. संमेलन स्थळी गोमाता पूजन व भारत माता पूजन मान्यवरांच्या हस्ते करण्यात आले.
अध्यक्षीय भाषणात महेश महाजन यांनी हिंदुत्वाची जाणीव प्रत्येक धर्मबंधूमध्ये निर्माण झाल्यास सामाजिक ऐक्य अधिक बळकट होईल, असे मत व्यक्त केले.
संमेलनाच्या शेवटी महाप्रसादाचे वितरण करण्यात आले असून तब्बल ५२५ बंधू-भगिनींनी महाप्रसादाचा लाभ घेतला.
या संमेलनास नगराध्यक्ष पंडितराव देशमुख, भाजपा गटनेते अमोल कबुतरे व आरोग्य सभापती विष्णू जोगदंडे यांची विशेष उपस्थिती होती.
कार्यक्रमाचे सूत्रसंचालन रेणुकादास मुळे यांनी केले, प्रास्ताविक सतीश शेटे यांनी तर आभार सुधीर शेटे यांनी मानले.
संमेलनाच्या यशस्वी आयोजनासाठी सोमनाथ वस्ती परिसरातील स्वयंसेवक, सार्वजनिक गणेश मंडळ, जय अंबे नवरात्र उत्सव मंडळ, समर्थ बहुउद्देशीय प्रतिष्ठान, नीलकमल गणेश मंडळ, आई तुळजाभवानी नवरात्र उत्सव मंडळ व जय बजरंग मित्र मंडळाच्या कार्यकर्त्यांनी विशेष परिश्रम घेतले.
Related News
- वडिलांनंतर खंबीर आधार देणारा देवच हरपला – आमदार मनोज कायंदे
- नगराध्यक्षा मापारी यांच्या पुढाकाराने लोणार सरोवरातील माँ कमळजा देवी मंदिराचा प्रश्न मार्गी लागणार
- भरधाव टेम्पोची धडक; माय-लेकाचा जागीच मृत्यू, एका कुटुंबावर दु:खाचा डोंगर
👉 अधिक अशाच विश्वासार्ह आणि वेगवान बातम्यांसाठी Kattanews.in ला भेट द्या.
