बुलढाणा |२१ जानेवारी २०२६
ग्राहकांच्या हक्कांसाठी कार्यरत असलेल्या ग्राहक उपभोक्ता संरक्षण समितीच्या विदर्भ अध्यक्षपदी पत्रकार सचिन खंडारे यांची निवड करण्यात आली आहे. सामाजिक व पत्रकारिता क्षेत्रात नावलौकिक असलेले सचिन खंडारे यांची ही नियुक्ती ग्राहक फसवणुकीविरोधातील लढ्यास बळ देणारी मानली जात आहे. ग्राहकांचे हक्क, न्याय आणि संरक्षण या मुद्द्यांवर विदर्भात अधिक प्रभावी काम केले जाईल, अशी अपेक्षा व्यक्त केली जात आहे.
भारत सरकार नोंदणीकृत माणुसकी सोशल व ग्राहक संरक्षण फाउंडेशन अंतर्गत कार्यरत असलेल्या ग्राहक उपभोक्ता संरक्षण समितीमार्फत ही निवड करण्यात आली. राष्ट्रीय अध्यक्ष दादासाहेब केदारे आणि राष्ट्रीय सचिव डॉ. अविनाश झोटिंग यांनी दिनांक 18 जानेवारी रोजी अधिकृत निवड पत्र देत ही जबाबदारी सोपवली.
ग्राहक उपभोक्ता संरक्षण समिती संपूर्ण देशभरात कार्यरत असून ज्या ठिकाणी ग्राहकांची फसवणूक होते, त्या ठिकाणी पीडित ग्राहकांना न्याय मिळवून देण्यासाठी समिती सातत्याने प्रयत्न करते. पेट्रोल पंप, कृषी केंद्र, बँका, मोबाईल दुकाने, कापड दुकाने याठिकाणी होणाऱ्या फसवणुकीच्या तक्रारी वाढत असल्याचे निदर्शनास येत आहे.
या संदर्भात बोलताना सचिन खंडारे यांनी सांगितले की, बुलढाणा जिल्ह्यासह संपूर्ण विदर्भात ग्राहकांच्या तक्रारींवर तत्काळ दखल घेऊन त्यांना त्यांचे हक्क मिळवून देण्यासाठी ठोस भूमिका घेतली जाईल. तसेच सक्षम, जागरूक आणि अधिकार जाणणारा ग्राहक कसा घडवता येईल, यासाठी जनजागृती उपक्रम राबवले जातील.
या निवडीबद्दल जिल्हाध्यक्ष शालिकराम चव्हाण, विदर्भ पदाधिकारी सुनील अंभोरे, डॉ. गंगाराम उबाळे आदींनी सचिन खंडारे यांचे अभिनंदन करून पुढील कार्यासाठी शुभेच्छा दिल्या आहेत.
📢 हे आवश्यक करा
ग्राहक हक्क, सामाजिक प्रश्न आणि विदर्भातील ताज्या महत्त्वाच्या बातम्यांसाठी Kattanews.in ला Follow करा.
📰 Related News
