मेहकर-साखरखेर्डा रस्त्यावर रोहीचा थरार! दुचाकीला धडक; फार्मसी कॉलेजचे २ विद्यार्थी गंभीर

On: January 9, 2026 10:57 AM

मेहकर साखरखेर्डा रस्त्यावर रोही आल्याने दुचाकी अपघाताचे दृश्य

साखरखेर्डा /समाधान सरकटे

मेहकर-साखरखेर्डा रस्त्यावर रोही (निलगाय) आल्याने अपघात झाल्याची धक्कादायक घटना समोर आली आहे. या मेहकर साखरखेर्डा रोही अपघातात फार्मसी कॉलेजचे दोन विद्यार्थी गंभीर जखमी झाले असून, वाढत्या वन्यप्राणी उपद्रवामुळे मेहकर रोडवर अपघातांची संख्या वाढताना दिसत आहे. या घटनेमुळे नागरिकांमध्ये भीतीचे वातावरण आहे.

८ जानेवारी रोजी सकाळी सुमारे ११ वाजता गणपूर (ता. मेहकर) येथील अनिकेत चव्हाण (२२) आणि दीपक साळवे (२१) हे साखरखेर्डा येथील कै. भास्करराव शिंगणे कला, आशालता गावंडे वाणिज्य व नारायणराव गावंडे विज्ञान व फार्मसी कॉलेज येथे दुचाकीने जात होते.

दरम्यान, साखरखेर्डा–मेहकर मार्गावर सुखदेव जैवळ यांच्या शेताजवळ अचानक रोही (निलगाय) रस्ता ओलांडण्यासाठी धावून आली. क्षणातच दुचाकीची निलगायीशी जोरदार धडक बसली.

धडक इतकी भीषण होती की दोन्ही विद्यार्थी रस्त्यावर फेकले गेले आणि गंभीर जखमी झाले, तर निलगाय जागीच ठार झाली. अपघातानंतर स्थानिक नागरिकांनी तातडीने मदत करत जखमी विद्यार्थ्यांना प्राथमिक आरोग्य केंद्रात दाखल केले.

प्राथमिक उपचारानंतर दोघांनाही पुढील उपचारासाठी चिखली येथील रुग्णालयात हलवण्यात आले. मेहकर-साखरखेर्डा रस्त्यावर वन्यप्राण्यांचा वावर वाढल्याने अशा अपघातांची मालिका सुरू असून, प्रशासनाने तातडीने उपाययोजना कराव्यात, अशी मागणी होत आहे.