खडकी सदार | ४ जानेवारी २०२६
येथील स्व. किसनराव सदार विद्यालयामध्ये दिनांक ३१ जानेवारी रोजी कृतज्ञ दिन उत्साहात साजरा करण्यात आला. या कार्यक्रमाचे अध्यक्ष म्हणून जाधव सर (मुख्याध्यापक) उपस्थित होते, तर प्रमुख मार्गदर्शक म्हणून डॉ. ज्ञानेश्वर पाटील सदार यांनी विद्यार्थ्यांना मार्गदर्शन केले.
कार्यक्रमाची सुरुवात छत्रपती शिवाजी महाराज यांच्या प्रतिमेच्या पूजनाने करण्यात आली. त्यानंतर उपस्थित मान्यवरांचे पुष्पगुच्छ देऊन स्वागत करण्यात आले.
कार्यक्रमादरम्यान काही विद्यार्थ्यांनी कृतज्ञतेचे महत्त्व यावर आपले मनोगत व्यक्त केले. प्रमुख मार्गदर्शक डॉ. ज्ञानेश्वर पाटील सदार यांनी विद्यार्थ्यांना मार्गदर्शन करताना सांगितले की, निसर्गाने आपल्याला मानव शरीर दिले आहे, याबद्दल आपण सदैव कृतज्ञ असले पाहिजे.
ते पुढे म्हणाले की, “माणूस शरीराने विकलांग असला तरी मनाने मजबूत असणे गरजेचे आहे. आज अनेक तरुण अपयशामुळे आत्महत्येचा मार्ग निवडतात; मात्र आत्महत्या हा उपाय नाही. आलेल्या संकटांना सामोरे जाऊन चांगल्या दिवसांची वाट पाहणे हेच खरे जीवन आहे. जीवन सुंदर आहे, ते जगण्यासाठी आहे, मरण्यासाठी नाही.”
कार्यक्रमाचे अध्यक्ष जाधव सर यांनी विद्यार्थ्यांना सांगितले की, “जगात काहीही अशक्य नाही. फक्त मनाची आणि कष्ट करण्याची तयारी हवी. मेहनत ही जीवनाची शिदोरी आहे. प्रामाणिकपणा आणि सातत्य ठेवल्यास यश नक्की मिळते.”
अशा प्रेरणादायी वातावरणात स्व. किसनराव सदार विद्यालयात कृतज्ञ दिन साजरा करण्यात आला.
📌 संबंधित बातम्या













