साखरखेर्डा |१३ फेब्रुवारी २०२६
लोणार तालुक्यातील खापरखेड रेती घाटावर अवैध रेती उत्खनन सुरू असल्याचा गंभीर आरोप ग्रामस्थांनी केला आहे. पोकलॅंड मशीनच्या साह्याने दिवसाढवळ्या मोठ्या प्रमाणात रेती उपसा होत असून संबंधित ठेकेदार वाहतूक पास न घेता ४० ते ५० टन रेतीची बेकायदेशीर वाहतूक करत असल्याची माहिती पुढे आली आहे. या संपूर्ण प्रकारामुळे महसूल विभागाच्या भूमिकेवर प्रश्नचिन्ह निर्माण झाले असून प्रशासनाच्या कार्यक्षमतेवर शंका उपस्थित होत आहे.
१० टन क्षमतेच्या रस्त्यावरून ४० ते ५० टन वजनाचे रेतीचे टिप्पर भरधाव वेगाने धावत असल्याने मुख्यमंत्री ग्राम सडक योजनेअंतर्गत किनगाव जट्टू ते खापरखेड दरम्यान बांधण्यात आलेला सिमेंट रस्ता धोक्यात आला आहे. सततच्या अवजड वाहतुकीमुळे रस्ता अल्पावधीतच उध्वस्त होण्याची भीती व्यक्त केली जात आहे. बांधकाम विभागाने तातडीने लक्ष घालून या मार्गावरील अवजड वाहने थांबवावीत व ठेकेदाराने पर्यायी मार्ग उपलब्ध करून द्यावा, अशी मागणी करण्यात आली आहे.
प्रस्तावित गटातून किती रेती काढण्यात आली याचे मोजमाप करण्यात यावे, तसेच इतर गटातून झालेले उत्खनन तपासून संबंधित ठेकेदारावर दंडात्मक कारवाई करावी आणि नियमबाह्य उत्खनन केल्याप्रकरणी त्यांना ब्लॅकलिस्टमध्ये टाकावे, अशी मागणी नौशाद शेख (माजी उपसरपंच, दूसरबीड़) आणि रामेश्वर काळुसे (देऊळगाव कोळ) यांनी महसूल आयुक्त अमरावती यांना दिलेल्या निवेदनात केली आहे.
दिवसाढवळ्या सुरू असलेल्या या अवैध रेती उत्खनन प्रकरणात प्रशासन कारवाई करणार का, की हा प्रकार असाच सुरू राहणार, याकडे आता नागरिकांचे लक्ष लागले आहे.
📢 आपल्या परिसरातील समस्या आम्हाला कळवा – Kattanews.in आपल्या आवाजाला न्याय देईल.
Related News:
