जिजाऊ सृष्टीवर नगराध्यक्ष सौरभ तायडे यांचा गौरव; जिजाऊ जन्मोत्सव 2026 च्या नियोजनाला नवे बळ

सिंदखेडराजा येथील ऐतिहासिक जिजाऊ सृष्टी परिसरात नवनिर्वाचित नगराध्यक्ष सौरभ तायडे यांचा भव्य सत्कार करण्यात आला.
जिजाऊ जन्मोत्सव 2026 च्या नियोजनासाठी आलेल्या केंद्रीय आयोजन समितीच्या वतीने हा सत्कार सोहळा पार पडला.
जिजाऊ सृष्टी हे केवळ एक पर्यटन स्थळ नसून, महाराष्ट्राच्या सांस्कृतिक अस्मितेचे प्रतीक असल्याचे यावेळी अधोरेखित करण्यात आले.

यावेळी मराठा सेवा संघाचे प्रदेशाध्यक्ष विजयकुमार घोगरे,
जिजाऊ सृष्टीचे अध्यक्ष मधुकर मेहेकरे
आणि प्रदेश कार्याध्यक्ष नवनाथ घाडगे
यांनी राष्ट्रमाता जिजाऊ यांची प्रतिमा, मराठा सेवा संघाचे कॅलेंडर व पुस्तक भेट देत नगराध्यक्षांचा गौरव केला.

कार्यक्रमाला प्रा. शिवाजी तनपुरे, संभाजी ब्रिगेडचे प्रदेशाध्यक्ष मनोज आखरे,
जिजाऊ सृष्टीचे सहसचिव सौरभ खेडेकर, प्रकल्प संचालक अरविंद गावंडे,
मराठा सेवा संघाचे जिल्हाध्यक्ष रवींद्र चेके, मुख्य समन्वयक डॉ. मनोहर तुपकर,
जिजाऊ ब्रिगेडच्या जिल्हाध्यक्ष उर्मिलाताई हाडे, वारकरी परिषदेच्या ज्योतीताई जाधव,
संभाजी ब्रिगेडचे जिल्हाध्यक्ष पांडुरंग पाटील, तालुकाध्यक्ष विजय देशमुख
यांच्यासह अनेक मान्यवर उपस्थित होते.

मान्यवरांनी आपल्या मनोगतात सांगितले की, सौरभ तायडे हे महाराष्ट्रातील सर्वात तरुण नगराध्यक्ष असून,
राष्ट्रमाता जिजाऊंच्या पावन भूमीत नागरिकांच्या सेवेसाठी त्यांना मिळालेली संधी ही ऐतिहासिक आहे.
निवडणुकीनंतर लगेचच १२ जानेवारी २०२६ रोजी जिजाऊ जन्मोत्सव साजरा होत असल्याने,
हा योगायोग शहराच्या विकासासाठी निर्णायक ठरणार असल्याचे मत व्यक्त करण्यात आले.

सत्काराला उत्तर देताना नगराध्यक्ष सौरभ तायडे म्हणाले की,
जिजाऊ जन्मोत्सव हा संपूर्ण महाराष्ट्राचा सांस्कृतिक व ऐतिहासिक उत्सव आहे.
जिजाऊ नगरीचे वैभव जपणे आणि मातृतीर्थ सिंदखेडराजाचा सर्वांगीण विकास साधणे हेच माझे प्रमुख उद्दिष्ट राहील.
मराठा सेवा संघाच्या आयोजन समितीबरोबर समन्वय ठेवून नगराध्यक्ष म्हणून कोणतीही कमतरता भासू देणार नाही,
असे आश्वासन त्यांनी दिले.

कार्यक्रमाचे सूत्रसंचालन विलास तेजनकर यांनी केले.
या वेळी मोठ्या संख्येने जिजाऊ सृष्टीवरील पदाधिकारी व जिजाऊ भक्त उपस्थित होते.