अवैध रेती वाहतुकीचा कहर! आडविहीर पुलावर रेती सांडली; २ कार थेट नाल्यात कोसळल्या

नांदुरा तालुक्यातील एका रेती घाटातून परवानगी असल्याचे सांगत शेकडो टिप्पर, हायवा व ट्रॅक्टरद्वारे
दिवसरात्र रेती, माती व मुरुमाची वाहतूक सुरू आहे.
या वाहनांमधून रस्त्यावर सतत रेती सांडत असल्याने अनेक ठिकाणी वाहने घसरून अपघात होत आहेत.
हे प्रकार नित्याचे असतानाही महसूल व पोलीस विभागाकडून ठोस कारवाई होत नसल्याचा आरोप नागरिक करीत आहेत.

२५ डिसेंबरच्या रात्री ९ ते १० वाजेदरम्यान एका अज्ञात टिप्परमधून आडविहीर येथील पुलावर
१०० ते २०० फूट अंतरापर्यंत रेती सांडली.
नागमोडी वळण व अंधारामुळे रस्त्यावरील रेतीचा अंदाज न आल्याने
MH-04-JD-8245 क्रमांकाची कार पुलाचे कठडे तोडून ७० ते ८० फूट खोल नाल्यात कोसळली,
तर MH-19-CF-0069 ही दुसरी कारही अपघातग्रस्त झाली.

या अपघातात ५ ते ६ जण जखमी झाले असून अनेक दुचाकीस्वार व इतर वाहनेही घसरून पडली.
सुदैवाने दोन्ही कारमधील सर्व प्रवासी सुरक्षित असून
पोलिस व स्थानिक नागरिकांच्या मदतीने त्यांना बाहेर काढण्यात आले.
धक्कादायक बाब म्हणजे इतक्या मोठ्या घटनेची कुठेही अधिकृत नोंद झालेली नाही.