चिखली|१८ जानेवारी २०२६
चिखली–मेहकर मार्गावरील लव्हाळा नजीक गुरुवारी रात्री चिखली–लव्हाळा रस्त्यावर रोड रॉबरीचा थरार अनुभवायला मिळाल्याने परिसरात खळबळ उडाली.
पाटोदा फाट्याजवळ अज्ञात चोरट्यांनी रस्ता अडवून जाणाऱ्या वाहनांवर दगडफेक केल्याची धक्कादायक घटना रात्री साडेदहाच्या सुमारास घडली.
या घटनेत तब्बल १५ वाहनांच्या काचा फुटल्याने रात्री प्रवास करणाऱ्या वाहनचालकांमध्ये भीतीचे वातावरण निर्माण झाले.
प्राप्त माहितीनुसार, चोरट्यांनी हायवेवर दगड टाकून तसेच प्रवासी निवाऱ्यातील बाकडे रस्त्यावर आडवे ठेवून वाहने थांबवण्याचा प्रयत्न केला.
मात्र काही वाहनचालकांनी प्रसंगावधान राखत गाड्या न थांबवता वेगात पुढे नेल्याने मोठा अनर्थ टळला.
दरम्यान, प्रवासी निवाऱ्याच्या आडून जाणाऱ्या वाहनांवर जोरदार दगडफेक करण्यात आल्याने अनेक वाहनांचे नुकसान झाले.
याच वेळी सैलानी येथे दर्शनासाठी जात असताना साखरखेर्डा येथील बाबुसेठ कुरेशी यांच्या चारचाकी वाहनाचे टायर फुटले.
मात्र वाहनात क्रूझरमध्ये ८ ते १० जण असल्याचे लक्षात येताच चोरट्यांनी पळ काढला आणि रोड रॉबरीचा प्रयत्न फसला.
घटनेची माहिती मिळताच साखरखेर्डा पोलीस स्टेशनचे ठाणेदार गजानन करेवाड, दुय्यम ठाणेदार गणेश डोईफोडे,
पोलीस कॉन्स्टेबल विनायक परिहार यांच्यासह साखरखेर्डा, चिखली पोलीस व स्थानिक गुन्हे शाखेचे पथक तात्काळ घटनास्थळी दाखल झाले.
रात्रभर परिसरात कडेकोट बंदोबस्त ठेवून शोधमोहीम राबविण्यात आली; मात्र संशयित चोरटे अंधाराचा फायदा घेत फरार झाले.
रोड रॉबरीचा प्रयत्न फसल्याने चोरटे आजूबाजूच्या गावांमध्ये चोरीचा प्रयत्न करू शकतात,
या शक्यतेने पोलिसांनी परिसरातील पोलीस पाटील, तंटामुक्ती समितीचे पदाधिकारी आणि नागरिकांना सतर्क राहण्याचे आवाहन केले आहे.
रात्रीच्या वेळी अनोळखी ठिकाणी वाहन थांबवू नये, असे आवाहनही पोलिसांकडून करण्यात आले आहे.
याच परिसरातील सवडद येथील ग्रामविकास अधिकारी गौतम गवई यांच्या शेतातून कोंबड्या, एक क्विंटल कापूस आणि सोयाबीन चोरीला गेल्याचा प्रकार सकाळी उघडकीस आला असून
याबाबत साखरखेर्डा पोलिसांत तक्रार दाखल करण्यात आली आहे. सलग घडलेल्या घटनांमुळे जिल्ह्यातील हायवे सुरक्षेचा मुद्दा पुन्हा एकदा ऐरणीवर आला आहे.
हे पण वाचा.
- ५० मोटारपंपांनी ‘काळ्यापाण्याचा तलाव’ सिंचन तलाव रिकामा! मलकापूर पांग्रात गुराढोरांच्या पाण्याचा भीषण प्रश्न उभा
- मेडिकल अॅडमिशनच्या नावाखाली १३ लाखांची फसवणूक! आयुर्वेदिक संस्थेच्या डॉक्टरवर गुन्हा दाखल
- अखेर “कट्टा न्यूज” चा दणका: शेतकरी नेत्यांच्या एकजुटीमुळे प्रशासन झुकले, तालुका कृषी अधिकारी कांबळे तात्काळ निलंबित
Katta News सोबत अपडेट रहा:
अशाच विश्वासार्ह, थरारक आणि लोकहिताच्या बातम्यांसाठी Kattanews.in नियमित वाचा.
आपल्या परिसरातील बातम्या, व्हिडिओ किंवा माहिती आमच्यापर्यंत पोहोचवा.
