डोणगाव |१७ जानेवारी २०२६
मेडिकल अॅडमिशन फसवणूक, डॉक्टर फसवणूक प्रकरण आणि वैद्यकीय शिक्षण घोटाळा असा धक्कादायक प्रकार डोणगाव पोलीस स्टेशनच्या हद्दीत उघडकीस आला आहे. मुलीला वैद्यकीय शिक्षणासाठी मेडिकल कॉलेजमध्ये प्रवेश मिळवून देतो, असे आमिष दाखवून आयुर्वेदिक संस्थेच्या एका डॉक्टरने तब्बल १३ लाख ११ हजार रुपयांची फसवणूक केल्याचा आरोप करण्यात आला आहे.
डोणगाव पोलीस स्टेशन अंतर्गत येणाऱ्या ग्राम घाटबोरी येथील प्रकाश पुंजाजी पाखरे यांनी दिलेल्या तक्रारीनुसार, आरोपी डॉक्टरने २० मार्च २०२३ ते १६ जानेवारी २०२६ या कालावधीत मेडिकल अॅडमिशन करून देण्याच्या नावाखाली वेळोवेळी मोठी रक्कम घेतली.
आरोपी डॉक्टर प्रशांत रानडे (वय ६७) हे रुरल इन्स्टिट्यूट आयुर्वेदिक रिसर्च सेंटर, मायणी (ता. खटाव, जि. सातारा) येथे संचालक पदावर कार्यरत असून सध्या बोरीवली पूर्व, मुंबई येथे वास्तव्यास असल्याची माहिती आहे.
मुलीला वैद्यकीय महाविद्यालयात प्रवेश मिळवून देतो, असा विश्वास संपादन करून आरोपीने फिर्यादीकडून १३ लाख ११ हजार रुपये स्वीकारले. मात्र, ना प्रवेश मिळाला, ना पैसे परत करण्यात आले. अखेर फसवणूक झाल्याचे लक्षात येताच फिर्यादीने डोणगाव पोलीस स्टेशनमध्ये तक्रार दाखल केली.
या तक्रारीच्या आधारे डोणगाव पोलिसांनी आरोपी डॉक्टर प्रशांत रानडे यांच्याविरोधात भारतीय न्याय संहिता (BNS) कलम ३१६ (२) व ३१८ (१) अंतर्गत गुन्हा दाखल केला असून पुढील तपास सुरू आहे.
👉 Kattanews.in वर विश्वास ठेवा
अशा शिक्षण फसवणूक, गुन्हेगारी आणि जनहिताच्या बातम्यांसाठी Kattanews.in नियमित वाचा आणि अपडेट राहा.
🔗 हे पण वाचा..
