बकरी ईदच्या पार्श्वभूमीवर बुलढाण्यात हाय अलर्ट; प्रशासन सज्ज, नागरिकांना महत्त्वाचे आवाहन

👉 विशेष जाहिरात | अधिक माहितीसाठी क्लिक करा

जिल्ह्यातील सर्व तालुक्यांमध्ये यापूर्वीच शांतता समितीच्या बैठका पार पडल्या असून सर्व सदस्यांनी प्रशासनाला सहकार्य करण्याची भूमिका घेतल्याचे जिल्हाधिकाऱ्यांनी सांगितले. जिल्हा प्रशासनाने बकरी ईदच्या काळात कायदा-सुव्यवस्था अबाधित राहावी यासाठी विशेष उपाययोजना केल्या आहेत. संवेदनशील भागांमध्ये अतिरिक्त पोलीस बंदोबस्त तैनात करण्यात आला असून आवश्यक त्या सर्व विभागांना सतर्कतेच्या सूचना देण्यात आल्या आहेत.

जिल्हा पोलीस अधीक्षक निलेश तांबे यांनी सांगितले की, प्रतिबंधित जनावरांची अवैध वाहतूक रोखण्यासाठी जिल्ह्याच्या विविध सीमांवर आणि संवेदनशील ठिकाणी २४ तास कार्यरत विशेष तपासणी नाके उभारण्यात आले आहेत. पोलीस, महसूल प्रशासन, नगरपालिका आणि पशुसंवर्धन विभाग संयुक्तपणे या मोहिमेत काम करत असून प्रत्येक हालचालीवर बारकाईने लक्ष ठेवले जात आहे.

कोणतीही संशयास्पद हालचाल, अफवा किंवा सामाजिक शांतता भंग करण्याचा प्रयत्न दिसल्यास नागरिकांनी तात्काळ पोलीस प्रशासनाशी संपर्क साधावा, असे आवाहनही पोलीस अधीक्षकांनी केले. सोशल मीडियावर अफवा पसरविणाऱ्यांवर कठोर कारवाई करण्यात येणार असल्याचा इशाराही प्रशासनाने दिला आहे.

बैठकीत उपस्थित विविध समाजातील प्रतिष्ठित सदस्यांनी प्रशासनाला पूर्ण सहकार्य करण्याचे आश्वासन दिले. बुलढाणा जिल्हा हा सामाजिक सलोखा आणि शांततेसाठी ओळखला जातो, ही परंपरा कायम ठेवण्याचा निर्धार यावेळी सर्वांनी व्यक्त केला.

याच बैठकीत जिल्हाधिकाऱ्यांनी नागरिकांना मतदार यादी विशेष पुनरीक्षण कार्यक्रम, आगामी जनगणना आणि आयुष्मान भारत योजनेसंदर्भात सहकार्य करण्याचे आवाहन केले. शासनाच्या विविध योजनांचा लाभ नागरिकांपर्यंत पोहोचवण्यासाठी प्रशासन प्रयत्नशील असल्याचे त्यांनी स्पष्ट केले.

या बैठकीला निवासी उपजिल्हाधिकारी सुरेश कव्हडे, उपजिल्हाधिकारी समाधान गायकवाड यांच्यासह विविध विभागांचे अधिकारी उपस्थित होते. तसेच व्हिडिओ कॉन्फरन्सिंगद्वारे जिल्ह्यातील उपविभागीय अधिकारी, तहसीलदार, पोलीस निरीक्षक आणि शांतता समिती सदस्य सहभागी झाले होते.

बैठकीच्या शेवटी जिल्हाधिकारी आणि जिल्हा पोलीस अधीक्षक यांनी सर्व मुस्लिम बांधवांना आणि जिल्हावासीयांना बकरी ईदच्या मनःपूर्वक शुभेच्छा दिल्या.

हे पण वाचा..

• साखरखेर्ड्यात पोलवर वीज दुरुस्ती करताना कंत्राटी कामगाराचा मृत्यू; २५ वर्षांत पाचवी दुर्घटना
• घरासमोर लिंबू टाकून जादूटोणा? CCTV मुळे उघड झाला धक्कादायक प्रकार; चिखलीत आरोपीवर गुन्हा
• इंधन साठेबाजी आढळली तर थेट परवाना रद्द; जिल्हाधिकाऱ्यांचा पेट्रोल पंप चालकांना इशारा

हे आवश्यक करा..

बुलढाणा जिल्ह्यातील ताज्या आणि विश्वासार्ह बातम्यांसाठी Kattanews.in ला नियमित भेट द्या. आपल्या परिसरातील बातम्या, प्रशासनाचे निर्णय, राजकीय घडामोडी आणि ब्रेकिंग अपडेट्स सर्वात आधी वाचण्यासाठी वेबसाईट फॉलो करा.