साखरखेर्डा |समाधान सरकटे
साखरखेर्ड्यात पोलवर वीज दुरुस्ती करताना कंत्राटी कामगाराचा मृत्यू झाल्याची दुर्दैवी घटना मंगळवारी घडली. साखरखेर्ड्यातील वीज दुरुस्ती कामादरम्यान झालेल्या या दुर्घटनेमुळे परिसरात हळहळ व्यक्त होत आहे. कंत्राटी कामगाराचा मृत्यू झाल्यानंतर ग्रामस्थांनी संताप व्यक्त करत चौकशीची मागणी केली आहे. साखरखेर्ड्यात वीज दुरुस्ती करत असताना अचानक विजेचा धक्का लागल्याने कंत्राटी कामगाराचा मृत्यू झाल्याची माहिती समोर आली आहे.
मृतकाचे नाव बद्रीनाथ लक्ष्मण लंबे (वय ३५) असे असून ते वीज वितरण कंपनीत कंत्राटी कामगार म्हणून कार्यरत होते. ही घटना पिंपळगाव सोनारा शिवारात घडली. वादळामुळे खंडित झालेला वीजपुरवठा सुरळीत करण्यासाठी ते पोलवर चढून काम करत होते.
👉 विशेष जाहिरात | अधिक माहितीसाठी क्लिक करा
मिळालेल्या माहितीनुसार, सोमवारी सायंकाळी वादळामुळे साखरखेर्डा परिसरातील वीजपुरवठा खंडित झाला होता. रात्री उशिरापर्यंत वीज वितरण कंपनीच्या कंत्राटी कर्मचाऱ्यांनी विविध भागांमध्ये दुरुस्तीचे काम केले. मात्र पिंपळगाव सोनारा भागातील काही कामे शिल्लक होती.
मंगळवारी सकाळी बद्रीनाथ लंबे हे मारोती आश्रू वायाळ यांच्या शेताजवळील ट्रान्सफॉर्मर परिसरातील वीज पोलवर चढून काम करत होते. त्यावेळी अचानक वीज वाहक तारेचा स्पर्श झाल्याने त्यांना जबरदस्त धक्का बसला. गंभीर जखमी झाल्यानंतर ते खाली कोसळले.
घटनास्थळी उपस्थित शेतकऱ्यांनी तातडीने त्यांना साखरखेर्डा येथील डॉ. विशाल मगर यांच्या रुग्णालयात दाखल केले. मात्र प्रकृती गंभीर असल्याने डॉक्टरांनी चिखली येथे हलविण्याचा सल्ला दिला. चिखली येथे डॉक्टरांनी त्यांना मृत घोषित केले.
शवविच्छेदनानंतर मृतदेह नातेवाईकांच्या ताब्यात देण्यात आला. शिंदी येथे मोठ्या शोकाकुल वातावरणात त्यांच्यावर अंत्यसंस्कार करण्यात आले.
दरम्यान, काम सुरू करण्यापूर्वी साखरखेर्डा ३३ केव्ही उपकेंद्रातून रितसर परवानगी घेण्यात आली होती का, तसेच वीजपुरवठा सुरू कसा राहिला, याबाबत ग्रामस्थांनी गंभीर प्रश्न उपस्थित केले आहेत. या संपूर्ण प्रकरणाची सखोल चौकशी करून दोषींवर कारवाई करण्याची मागणी होत आहे.
घटनेची माहिती मिळताच सिंदखेडराजा येथील वीज वितरण कंपनीचे उपअभियंता श्रीनिवास बडगू यांनी घटनास्थळी भेट दिली. उपकेंद्रातील हजेरी बुक गायब असल्याचेही समोर आल्याची चर्चा आहे. यामुळे या प्रकरणाकडे अधिक गांभीर्याने पाहिले जात आहे.
याबाबत कनिष्ठ अभियंता रोहित पाटील यांच्याशी संपर्क साधण्याचा प्रयत्न करण्यात आला. मात्र त्यांच्याशी संपर्क होऊ शकला नाही. वृत्त लिहिपर्यंत साखरखेर्डा पोलीस स्टेशनमध्ये कोणतीही तक्रार दाखल करण्यात आली नव्हती.
“कंत्राटी कामगार अपघाताची दोन दिवसांत चौकशी करून दोषींवर कारवाई करण्यात येईल.”
— श्रीनिवास बडगू, उपअभियंता, सिंदखेडराजा
Related News
- वादळामुळे बुलढाणा जिल्ह्यात वीजपुरवठा विस्कळीत
- वीज कामगारांच्या सुरक्षेचा प्रश्न पुन्हा ऐरणीवर
- सिंदखेडराजा तालुक्यातील ताज्या घडामोडी
हे आवश्यक करा..
स्थानिक बातम्या, ब्रेकिंग न्यूज आणि Google Discover वर ट्रेंडिंग अपडेट्ससाठी Kattanews.in ला नियमित भेट द्या.
