नेतनसा प्रकल्पातून शेतीसाठी पाणी उपसा तात्काळ बंद; पाटबंधारे विभागाचा आदेश, पंप-मोटारी जप्त करण्याचा इशारा

डोणगाव | माधव भांदुर्गे

पिण्याच्या पाण्याचा भविष्यातील प्रश्न गंभीर होऊ नये, यासाठी पाटबंधारे विभागाने नेतनसा ल.पा. प्रकल्पातून शेती आणि सिंचनासाठी होणाऱ्या पाणी उपशावर कडक भूमिका घेतली आहे. शेतीसाठी सुरू असलेला पाणी उपसा तात्काळ बंद करण्याचे निर्देश देण्यात आले असून, आदेशानंतरही अनधिकृतपणे पाणी उपसा सुरू ठेवल्यास पंप, विद्युत मोटारी, पाइपलाइन आणि इतर साहित्य जप्त करण्याचा स्पष्ट इशारा देण्यात आला आहे.

यंदा पर्जन्यमान कमी राहण्याची शक्यता आणि भविष्यातील संभाव्य पाणीटंचाई लक्षात घेऊन पाटबंधारे विभागाने ही कार्यवाही सुरू केली आहे. पिण्याच्या पाण्याची उपलब्धता सुरक्षित ठेवण्यासाठी जलसाठ्याचा वापर काटेकोरपणे करण्यावर विभागाचा भर आहे.

रिसोड येथील पाटबंधारे शाखेने नेतनसा ल.पा. योजनेतून शेती व सिंचनासाठी होणारा पाणी उपसा तात्काळ बंद करण्याचे निर्देश दिले आहेत. पाटबंधारे शाखा, रिसोडचे सहाय्यक अभियंता (श्रेणी-२) कु. पु. अ. श्रीवास यांनी मादणी (ता. मेहकर) ग्रामपंचायतीचे सरपंच आणि सचिव यांना याबाबत अधिकृत पत्र पाठवले आहे.

ग्रामपंचायत क्षेत्रातील सर्व शेतकऱ्यांना या आदेशाची माहिती तातडीने देण्याच्या सूचना करण्यात आल्या आहेत. यासाठी गावात दवंडी अथवा इतर प्रभावी माध्यमातून जनजागृती करण्याचे निर्देश ग्रामपंचायतीला देण्यात आले आहेत.

नदी, नाले, कालवे आणि जलाशयांमधून शेती अथवा सिंचनासाठी पाण्याचा उपसा करण्यास बंदी असल्याचे शेतकऱ्यांना स्पष्टपणे कळविण्याचे पत्रात नमूद करण्यात आले आहे. सध्या शेतीसाठी पाणी उपसा सुरू असलेल्या शेतकऱ्यांनी तो स्वतःहून आणि तात्काळ बंद करावा, असेही आवाहन करण्यात आले आहे.

सूचना देऊनही पाणी उपसा सुरू राहिल्यास कारवाई

पाटबंधारे विभागाने दिलेल्या सूचनेनंतरही कोणी अनधिकृत किंवा बेकायदेशीरपणे पाणी उपसा करताना आढळल्यास संबंधित व्यक्तीवर कडक कायदेशीर कारवाई केली जाणार आहे. त्याचबरोबर पाणी उपशासाठी वापरण्यात येणारे पंप, विद्युत मोटारी, पाइपलाइन तसेच इतर साहित्य जप्त करण्यात येणार असल्याचे स्पष्ट करण्यात आले आहे.

पावसाचे प्रमाण कमी राहिल्यास आगामी काळात पिण्याच्या पाण्याचा प्रश्न निर्माण होण्याची शक्यता लक्षात घेऊन जलसाठ्याचे नियोजन करण्याची गरज आहे. त्यामुळे पाणीपुरवठा विभाग आणि जलसंपदा विभागाने योग्य समन्वय ठेवून संभाव्य पाणीटंचाईची परिस्थिती नियंत्रणात आणण्यासाठी तातडीने उपाययोजना कराव्यात, असे निर्देश देण्यात आले आहेत.

या आदेशाची प्रत वाशीम पाटबंधारे विभागाचे कार्यकारी अभियंता, रिसोड व मेहकरचे तहसीलदार तसेच रिसोड आणि मेहकर पंचायत समितीचे गटविकास अधिकारी (BDO) यांना पुढील आवश्यक कार्यवाहीसाठी पाठवण्यात आली आहे.

पाणी हा केवळ शेतीचा नाही, तर प्रत्येक गावाच्या भविष्यातील जीवनाचा प्रश्न आहे. त्यामुळे उपलब्ध जलसाठ्याचा योग्य वापर करणे आणि संभाव्य पाणीटंचाई टाळण्यासाठी प्रशासनाला सहकार्य करणे महत्त्वाचे ठरणार आहे.