“या तांदळाची खिचडी तहसीलदारांनी बायका-पोरांसोबत खावी!” चिखलीत संतप्त नागरिकांनी तहसील कार्यालयासमोरच ओतला रेशनचा तांदूळ

Buldhana News : चिखलीत रेशनच्या तांदळावरून संतापाचा उद्रेक झाला आहे. निकृष्ट दर्जाचा असल्याचा आरोप असलेला तांदूळ हातात घेऊन संतप्त नागरिक थेट तहसील कार्यालयात पोहोचले. एवढेच नाही, तर तहसीलदारांच्या कॅबिनसमोरच हा तांदूळ ओतून नागरिकांनी प्रशासनाचा निषेध केला.

“या तांदळाची खिचडी तहसीलदारांनी बायका-पोरांसोबत खावी; मग आम्ही सुद्धा खाऊ,” अशा शब्दांत नागरिकांनी आपला संताप व्यक्त केला. रेशनमधून मिळणारे धान्य जर खाण्यायोग्य नसेल, तर गरीबांच्या ताटात हे धान्य पोहोचतेच कसे, असा सवाल यानिमित्ताने उपस्थित झाला आहे.

सोमवार, २४ ऑगस्ट रोजी हा प्रकार चिखली तहसील कार्यालयात घडला. स्थानिक स्वस्त धान्य दुकानातून मिळालेला तांदूळ खराब, चुरगळलेला आणि खाण्यायोग्य नसल्याचा आरोप संबंधित नागरिकांनी केला. तक्रार घेऊन नागरिक तहसील कार्यालयात पोहोचले आणि त्यांनी संबंधित तांदूळ अधिकाऱ्यांच्या निदर्शनास आणून दिला.

मात्र, केवळ तक्रार करण्यावर नागरिक थांबले नाहीत. त्यांनी तहसीलदारांच्या कॅबिनसमोरच तांदूळ ओतून आपला रोष व्यक्त केला. या प्रकारामुळे तहसील कार्यालयात काही काळ चर्चेचे वातावरण निर्माण झाले.

“जे धान्य जनावरेही खाणार नाहीत, ते माणसांच्या ताटात देऊन त्यांच्या आरोग्याशी खेळणार का?” असा सवाल नागरिकांनी केला. गरीब आणि गरजू कुटुंबांना रेशनच्या माध्यमातून मिळणारे धान्य दर्जेदार असणे आवश्यक आहे. त्यामुळे धान्याचा दर्जा तपासण्याची यंत्रणा नेमकी कशी काम करते, असा प्रश्नही उपस्थित करण्यात आला.

नागरिकांच्या म्हणण्यानुसार, रेशन दुकानातून मिळणाऱ्या धान्याच्या गुणवत्तेबाबत यापूर्वीही तक्रारी करण्यात आल्या आहेत. त्यामुळे या प्रकरणाची चौकशी करून संबंधित रेशन दुकानातील साठ्याची तपासणी करावी, धान्याचा दर्जा तपासावा आणि दोष आढळल्यास संबंधितांवर कारवाई करावी, अशी मागणी नागरिकांकडून करण्यात आली.

दरम्यान, पुरवठा विभागाने संबंधित नागरिकाची तक्रार गांभीर्याने घेतल्याचे सांगितले. चिखलीच्या पुरवठा निरीक्षक प्रियंका सोनूकुसळे यांनी या प्रकरणाची माहिती वरिष्ठ अधिकाऱ्यांना देण्यात येणार असल्याचे स्पष्ट केले.

“सदरील व्यक्तीची तक्रार आम्ही गांभीर्याने घेतली असून, यासंदर्भातील तक्रार वरिष्ठांना कळवण्यात येईल. तसेच भविष्यात धान्य पुरवठा सुरळीत राहून नागरिकांना चांगल्या दर्जाचे धान्य मिळण्यासाठी योग्य तो प्रयत्न केला जाईल.”

मात्र, आता या तक्रारीनंतर प्रत्यक्षात काय कारवाई होते, याकडे नागरिकांचे लक्ष लागले आहे. संबंधित रेशन दुकानातील धान्यसाठा तपासला जाणार का, निकृष्ट धान्याचा पुरवठा नेमका कुठून झाला, धान्याच्या गुणवत्तेची अधिकृत तपासणी होणार का आणि दोषी आढळल्यास संबंधितांवर कारवाई केली जाणार का, हे पाहणे महत्त्वाचे ठरणार आहे.

रेशन व्यवस्था ही गरीब आणि गरजू कुटुंबांसाठी अत्यंत महत्त्वाची आहे. त्यामुळे लाभार्थ्यांच्या ताटात पोहोचणारे धान्य सुरक्षित आणि दर्जेदार असणे आवश्यक आहे. चिखलीतील या प्रकारामुळे रेशनच्या तांदळाच्या गुणवत्तेचा मुद्दा पुन्हा एकदा चर्चेत आला असून, प्रशासनाच्या पुढील कारवाईकडे नागरिकांचे लक्ष लागले आहे.